Иако сочинуваат само 4 проценти од светската популација, САД денес имаат дури 40 проценти од светските милионери, покажува извештајот UBS Global Wealth Report 2025. Овој годишен извештај на швајцарската банка UBS дава детален преглед на создавањето и распределбата на богатството во повеќе од 50 клучни светски пазари, со посебен фокус на регионите што најбрзо растат и клучните трендови во глобалната економија.

Милионери на секој агол

Во текот на 2024 година, светот доби повеќе од 680.000 нови милионери, што претставува раст од 1,2 проценти во однос на претходната година. Од оваа бројка, дури 379.000 доаѓаат од САД, што значи дека оваа земја во просек создавала повеќе од 1.000 нови милионери дневно.

Вкупниот број милионери во САД сега изнесува речиси 24 милиони — повеќе отколку во Западна Европа и Кина заедно. Од друга страна, Кина истата година додала 141.000 нови милионери, а Индија 39.000.

Најголем регионален раст на вкупното лично богатство во 2024 е забележан во Источна Европа, со скок од над 12 проценти. Северна Америка е веднаш зад неа, главно благодарение на силните резултати на САД. Кина и Југоисточна Азија бележат умерен раст, додека Западна Европа, Океанија и Латинска Америка забележале благ пад во однос на претходната година.

Доминација на САД и Кина

САД и Кина заедно поседуваат повеќе од половина од светското лично богатство. Само САД имаат удел од 35 проценти во глобалното богатство на приватни лица, додека Кина учествува со речиси 20 проценти. Заедно имаат над 30 милиони милионери.

Според UBS, овие две сили не само што предничат по бројот на милионери, туку и по вкупната вредност на имотот, бројот на лица со голема нето вредност, како и по динамиката на раст на богатството.

Кога станува збор за распределбата на богатството по континенти, ситуацијата е следна:

Северна Америка – 43,2 проценти од светските милионери
Западна Европа – 26,2 проценти
Кина – 12,9 проценти
Југоисточна Азија – 9,3 проценти

Интересно е што земји како Швајцарија и Луксембург имаат најголема густина на милионери по глава на жител. Во Луксембург, секој седми возрасен граѓанин е милионер, што е највисока концентрација во светот.

Кој заостанува?

Додека САД и Кина бележат историски раст, Западна Европа бележи стагнација и намалување на уделот во глобалното богатство. Земјите во развој, вклучително Латинска Америка, Океанија и Африка, поседуваат само околу 30 проценти од светското богатство, без значајни поместувања на повидок во блиска иднина.

Демографските и економските предизвици дополнително го забавуваат растот на богатството во тие региони, наведува UBS.

UBS предвидува дека до 2029 година уште 5,34 милиони луѓе ќе станат милионери, што е речиси 9 проценти повеќе од 2024. Најголемиот придонес за тој раст и понатаму ќе доаѓа од Северна Америка и Кина, додека од Европа и Југоисточна Азија се очекува стабилен, но малку побавен напредок.

Латинска Америка и Океанија ќе имаат споредна улога, додека во глобалната трка за создавање богатство главните улоги ќе продолжат да ги играат САД и Кина.

Вредноста на вкупното богатство

Во 2024 година, вкупното лично богатство во светот пораснало за 4,6 проценти, по растот од 4,2 проценти во 2023. Вкупната вредност на богатството што го поседуваат речиси 60 милиони милионери во светот се проценува на над 226 трилиони долари.

UBS забележува дека, и покрај вкупниот раст, разликите помеѓу регионите остануваат изразени. Богатството и понатаму се концентрира во ограничен број земји, додека посиромашните региони сè уште заостануваат во создавањето нова вредност.

Извештајот на UBS уште еднаш го потврдува економскиот јаз помеѓу богатите и остатокот од светот. САД остануваат светски лидер во создавањето богатство, а растот на бројот на милионери продолжува, без оглед на глобалните предизвици. Во ера на технолошки напредок, демографски промени и геополитички тензии, јасно е дека центрите на богатство сè повеќе се консолидираат и дека борбата за глобално економско влијание ќе стане сè поинтензивна.

Извор: okno.mk/ bonitet.com