Американската актерка Сузан Сарандон (78) во неодамнешното интервју за „Тајмс“ откри дека била отпуштена од нејзината агенција. Таа веќе не може да глуми во големи филмови, а актерката навести дека главната причина за отказот била нејзината изјава за конфликтот меѓу Израел и Палестина.

Минатиот ноември, Сарандон учествуваше на протест во Њујорк, каде што изјави дека „Евреите сега знаат како е да се биде муслиман“. Не долго потоа, Обединетата агенција за таленти, предводена од Џереми Цимер, ја отпушти Сарандон и покрај нејзиното извинување за изјавата.

Актерката ги нарече нејзините зборови – „огромна грешка“.

„Бев отпуштена од мојата агенција, моите проекти беа повлечени. Ме користеа како пример за тоа што не треба да се направи ако сакаш да продолжиш да работиш“, изјави Сарандон.

„Толку многу луѓе останаа без работа од ноември минатата година. Ги загубија своите работни места како кустоси, писатели, сликари, работници во кафетериите, заменски наставници… Тие беа отпуштени само поради тоа што напишаа свој став на социјалните мрежи, односно повикаа на прекинување на војната“, додаде таа.

На прашањето за потенцијалните нови улоги, таа истакна дека веројатно нема да биде вклучена во нови проекти во Холивуд.