Кошаркарската репрезентација на Германија е новиот европски шампион, откако вечерва во финалето на Евробаскетот што се одржа во Рига, ја совладаа Турција со 88:83 и по вторпат во историјата се искачи на европскиот врв.

Финалето мина во вистинска драма, изедначеност од првата до последната минута, но во завршницата, Германците покажаа поголема зрелост и прецизност, што на крајот им го донесе трофејот.

Турција одлично го отвори натпреварот и со фуриозен старт поведе со 13:2, но Германија брзо се консолидираше. Со серија од 7:0 и одлична одбрана, го прекина налетот на ривалот, ја врати контролата и првпат поведе со 19:16. Првата четвртина заврши со минимално водство на Германија од 24:22. Во вториот период се водеше жестока битка, со чести промени на водството и нерешен резултат. Турците, предводени од расположениот Алперен Шенѓун и енергичниот Адем Бона, ја презедоа иницијативата и на полувремето заминаа со предност од 46:40.

Во третата четвртина, иако се играше во сличен ритам, Турција во еден момент се одлепи на 61:55, благодарение на Чеди Осман и Шенѓун. Сепак, Германија не се предаде. Андреас Обст, Да Силва и Тајман вратија со важни тројки, а токму Тајман донесе нов пресврт сопоени за 65:63.

Пред последната четвртина, Турција повторно поведе со минимални 67:66. Се чинеше дека ќе ја задржи предноста, но на помалку од две минути до крај, Даниел Тајс погоди тројка за водство од 82:81, по што следуваа клучни поени на Денис Шродер. Во продолжение Шенѓун имаше обид во завршницата, но не беше прецизен. 

На крајот Германија дојде и до европската титула, откако претходно во Манила стана и светски шампиони.