Врховниот суд на Израел соопшти дека сите членови на Судскиот совет во септември ќе ги разгледуваат претставките против контроверзниот закон на Владата на премиерот Бенјамин Нетанјаху усвоен минатата недела, кој предизвика масовни протести низ целата земја.

Законот е дел од промените во судскиот систем на Израел што Владата на Нетанјаху планира да ги спроведе за да ги ограничи овластувањата на Врховниот суд. Планираните реформи во правосудскиот систем на Израел предизвика повеќемесечни протести во земјата и критики од Вашингтон.

Противниците на правосудната реформа сметаат дека доколку се усвојат законите, власта ќе биде концентрирана во рацете на владејачката коалиција и ќе го поткопа системот на контроли. Додека според поддржувачите неопходно е да се ограничи моќта на судиите.

Нетанјаху и неговите сојузници минатата недела донесоа закон со кој се отстранува можноста Врховниот суд да ги поништи владините одлуки доколку ги смета за неразумни.