Судијата и поранешен претседател на Основниот суд во Кавадарци, Лазар Нанев, е разрешен од функцијата член на Судскиот совет. Највисокото судско тело оваа одлука ја донело попладнево, откако претходно едногласно одлучи јавноста да биде исклучена од расправата и одлучувањето за утврдување одговорност на Нанев и таа да се води зад затворени врати.

Образложението поради кое се одлучуваше без увид на јавноста е дека тоа се прави поради заштита на угледот и интегритетот на Нанев. Подносител на барањето за утврдување одговорност од судијата Нанев е претседателката на Судскиот совет, Весна Дамева, која со него беше со месеци во отворен судир.

Одговорност од Нанев се бараше откако во јавноста излезе информацијата дека тој остварил 95 телефонски контакти со обвинет во предмет кој самиот го водел. За него се водеше и уште една постапка пред Судскиот совет.