Судскиот совет на денешната седница едногласно ги одобри двете барања на судијата Лазар Нанев од Основниот суд во Кавадарци јавноста да биде исклучена во постапките за утврдување на негова одговорност како судија.

Претходно самиот судија во постапката која Судскиот совет ја поведе против него побара да биде јавна иако согласно член 61, став 2 од Законот за судски совет ако „постапката е итна и од доверлив карактер, се води без присуство на јавноста и со почитување на угледот и достоинството на судијата или претседателот на судот при што се води сметка за заштита на личните податоци на судијата или претседателот на судот согласно со прописите за заштита на личните податоци“.

Судијката Лорета Горгиева ја обвини претседателката Весна Дамева дека сторила процесна повреда па побара членовите да гласаат зад затворени врати и во однос на барањата на судијата Нанев, па се отвори расправа околу моментот кога ќе се исклучи јавноста од следењето на оваа постапка.

– Не можам да се согласам по наводите на колешката Лорета дека и по барањето на судијата со кое бара да биде исклучена јавноста во понатамошнот тек од постапката спрема него во предметите кои ги наведува, одлучувањето по ова прашање треба да биде на седница во која е исклучена јавноста. Од содржината на барањето јасно се гледа дека тој бара во понатамошниот тек на дадени постапки за кои претходно барал да биде вклучена јавноста, сега бара да биде исклучена и во ред е, тоа е негово право. Тоа се тајни постапки по закон за Судски совет и може да бидат јавни, а заради зачувување на интегритетот на судијата сè до донесувањето на конечна одлука, но во случајов имаше барање од самиот судија да бидат јавни. Ние само ја спроведовме желбата на судијата да бидат јавни постапките. Сега бара да продолжат постапките, но без присуство на јавноста. Сега пред јавноста не одлучуваме за постапките, туку само по однос на барањето – рече судијката Тања Чачарова – Илиевска.

На ова одговори претседателката на Советот, Дамева.

– Сметам дека барањето на судијата за исклучување на јавноста не треба да биде одбиено бидејќи на тој начин ќе му се одземе неговото законско право за неговата одговорност да се одлучува на нејавна седница, но сериозно сум загрижена затоа што судијата не е конзистентен во неговото барање. На јавноста ѝ е познато дека досегашниот тек на постапката беше јавна токму по барање на судијата за што одлука донесе Советот, а јавноста беше известена. Јавноста покажа сериозен интерес за следење на оваа постапка, но жалам што колегата се премисли и одлучи да го користи законското право што апсолутно му е легитимно и одлучи натамошниот тек на постапката да се одвива зад затворени врати и со тоа на јавноста некако како да ѝ го ускрати правото да ги слушне фактите и аргументите на членовите на Советот како и јавно да го следи гласањето – рече претседателката Дамева.

Судијата Лазар Нанев e под истрага за контроверзно постапување во случај кога како судија примил во работа предмет против обвинет со кој остварил 95 телефонски повици, па потоа донел и пресуда.

Судијата Нанев на отворената седница на Судскиот совет минатиот месец рече дека постапката против него претседателката Дамева ја покренала поради „лична нетрпеливост кон него“ со цел „лична дискредитација при конкурсите и обидите за унапредување“.