Како дел од проектот „Бистро-матно“ за редовни месечни и годишни анкети за корупција, „Транспаренси интернешнл – Македонија“, ги објави настаните кои беа актуелни во јануари.

Како дел од „матните“ настани во месец јануари предничи апсењето на судијка од Велес и газди на ланец аптеки поради фалсификување службена исправа и за употреба на исправа со невистинита содржина.

„Основното јавно обвинителство Кавадарци поднесе обвинение против судијка од Основниот суд во Велес, двајца сопружници – сопственици на ланец аптеки и правното лице, кои се товарат за фалсификување службена исправа и за употреба на исправа со невистинита содржина. Првообвинетата, постапувајќи во предмет во кој тужители се останатите обвинети, донела пресуда со која им го усвоила тужбеното барање и им утврдила право на сопственост на деловен простор и земјиште под зграда. Иако пресудата не била правосилна и извршна, а тужените навреме изјавиле жалби, судијката поттикната со умисла од сообвинетите, ја заверила со службен печат за правосилност и извршност со што свесно внела невистинит податок во службената исправа. Ваквата службена исправа со невистинита содржина таа ја дала на рака на управителката на правното лице, наместо преку судска достава“, велат од Транспаренси.

Како втор најматен настан за јануари е анализата на Слободна Европа која покажува дека за вкупно 244 милиони евра е оштетен буџетот изминатава деценија.

„За вкупно 244 милиони евра е оштетен буџетот изминатава деценија, покажува анализата Радио Слободна Европа на 30 високо профилни судски случаи. Обвинителите побарале од судот да им се конфискува имот на десетина обвинети во вредност од околу 62 милиони евра, а Судот одобрил конфискација во 5 предмети вредна 49 милиони евра. Становите на Груевски уште чекаат одлука од Влада. Речиси 62 милиони евра би можела да „тежи на хартија“ Агенцијата за конфискуван имот, доколку судот ги прифател барањата на обвинителите за заплена на имотот стекнат со криминал, покажува анализата на Радио Слободна Европа на 30 високо профилни судски случаи во последните 10 години. Според анализираните предмети, Судот во пет од 30 судски случаи пресудил од бараните 62 милиони да се конфискува имот во вредност од 49 милиони евра. Доколку до сега се наплателе овие пари, државата би можела со нив, на пример да плати камата за првите три години од унгарскиот кредит, или да изгради најмалку 30 нови училишта. Станува збор за пресуди со конфискација кои и по неколку години од правосилност се уште не се во целост реализирани и наплатени. Тоа се пресудите во предметите „Империја“, „Плацевите на Водно“, „Труст“ и „Диамед“ “.

Како трет „матен“ настан за јануари е ревизорскиит извештај во ПИОМ во кој се откриени и „фиктивни“ вработувања.

„Останува дупката во ПИОМ – откриени и „фиктивни“ вработувања – Државниот завод за ревизија (ДЗР) изврши ревизија на финансиските извештаи на Фондот на пензиско и инвалидското осигурување за 2023 година, при што е утврдено неповолно мислење за вистинитоста и објективноста на финансиската состојба. ДЗС не ги одржува својот имот и опрема, а нема ни национална стратегија за спасување и заштита – предупредуваат ревизорите од ДЗР – Неевидентирани објекти од доделениот имот на ДЗС, запуштени и нефункционални засолништа, технолошки застарена, неупотреблива и несервисирана опрема, непостојна национална стратегија за заштита и спасување по 2018 година, недостаток на критериуми за набавка на противпожарна опрема, недоволен број пилоти, неоправдано ангажирање на брокер за осигурување на авионите… се дел од констатациите во извештајот на Државниот завод за ревизија за извршената ревизија во Дирекцијата за заштита и спасување, за 2023 година. ДЗР: Слабостите во управувањето со здравствените услуги и лекови создаваат финансиски и оперативни предизвици во Клиниката за дерматологија – Изразено е неповолно мислење во однос на вистинитоста и објективноста на финансиските извештаи и за усогласеноста на финансиските трансакции со релевантната законска регулатива за 2023 година за сметката за средства од фондот 737, додека за сметката за сопствени приходи 531 изразено е мислење без резерва во однос на вистинитоста и објективноста на финансиските извештаи и мислење со резерва за усогласеноста на финансиските трансакции со релевантната законска регулатива за 2023 година – се вели во соопштението.

Исто така како дел од матните настани е и анкетата која ја спроведе Коалицијата Сите за правично судење, во која граѓаните дадоа тројка на судските услуги.

„На скалата од еден до пет граѓаните кои биле странки во судска постапка, обвинети, оние административни услуги во Судовите, адвокати, јавни обвинители и новинари дале оценка тројка за судските услуги. Ова го покажува анкетата која ја спроведе Коалицијата Сите за правично судење на барање на Здружението на судии. Девет проценти од 1100 анкетирани граѓани кажале дека им било побарано мито, на една третина директно од судиите, а на останатите од други судски службеници. Граѓаните се најнезадоволни од брзина на судските постапки, која е последица на зголемениот број на судски предмети, а намалениот број на судии за што предупредуваше Коалицијата“

Во „бистри“ случаи на Транспаренски интернешнл – Македонија е обвинението за 16 лица во предметот Премин каде полицајци барале поткуп па си го делеле меѓу себе, поднесен обвинителен акт против поранешен в.д. директорот на Јавното комунално претпријатие „Гази Баба 2007“ кој фиктивно вработувал сезонски работници, апсењето на хирург по примање поткуп за операција во Битолската клиничка болница и приведувањето на полицаец кој барал пари од странка за да извади пасош.