Судиите и Подружницата на здружение на судии на Основен суд Тетово застанаа во одбрана на својот колега, Ељмедин Ферати кој го осуди возачот Менсур Пајазити на две години затвор за сообраќајката во која смртно ја прегази младата Теодора Ристовска во 2022 година. Според нивното објаснување, судијата во повторена постапка го осудил обвинетиот со максимално дозволена казна затвор, затоа што со оглед на тоа што Врховниот суд ги укинал пресудите, не смеел да се досуди повисока казна на штета на обвинетиот.

-Ценејќи ги сите околности, судијата, во повторената постапка, обвинетиот го осудил со максималната дозволена казна затвор, имајќи ја во предвид забраната за менување на полошо (Reformatio in peius) како начело предвидено во ЗКП, во ситуација кога по барање на обвинетиот Врховниот суд ги укинал пресудите и предметот го вратил на првостепениот суд на повторно одлучување и поради оваа забрана новата пресудата не смее да се измени на штета на обвинетиот ниту во однос на правната квалификација на делото, ниту во однос на кривичната санкција – се вели во реакцијата на Подружницата на здружение на судии.

Тие апелираат до сите чинители на општеството, да се воздржат од неоправдани коментари.

-Да се воздржат од неоправдани коментари, и да не се користи ова пресуда за неосновани напади на судиите, стигматизирање и јавен линч на судиите кои постапувале во конкретниот предмет, заради постигнување на други цели, бидејќи на тој начин се нарушува угледот на судиите, се задира во независноста на судството и се повредува функционирањето на владеењето на правото како основна демократска придобивка – се вели во реакцијата.

Премиерот Христијан Мицкоски по изрекувањето на пресудата го повика Судскиот совет да ја преиспита, а претседател на ова тело, Александар Камбовски веднаш состави работна група и направи увид во предметот. Извештајот се очекува да биде објавен во текот на денот, но од она што го кажа Камбовски предметот ќе се врати повторно во суд.

-Завршена е работата на работната група, доставена е информација, меѓутоа се уште немав можност да ја видам таа информација и веднаш ќе биде објавена и предметот ќе биде вратен назад во судот. Во текот на денот очекуваме да излеземе со повеќе информации- изјави Камбовски.

Судската голгота за случајот со Ристовска трае од 2023 година, кога првостепениот суд во Тетово на Пајазити му пресудил три години и шест месеци затвор, а максималната казна за делото за кое го товари е пет години затвор. Пајазити се жалел на пресудата на Апелациониот суд во Гостивар. Од јавно објавената пресуда на Апелација, вишата јавна обвинителка Вјолца Елмази прво барала неговата жалба да се одбие, но потоа на јавна седница побарала да му биде досудена пониска затворска казна.

Апелација ги прифаќа олеснителните околности и му ја намалува казната за две години затвор. Обвинителството уште од почеток го товари возачот за пониска затворска казна за ова дело.

Осудениот се жалел и до Врховен суд, кој го вратил предметот на повторно судење, а видел нејаснотии во постапувањето на Основниот суд во Тетово во признанието вина на Пајазити, кој прво пред судот рекол дека е невин, а потоа најавил дека ќе признае вина.

Највисокиот суд забележува дека тетовскиот суд ја продолжил главната расправа и во доказна постапка ги изведувал само доказите предложени од Обвинителството, а не и доказите предложени од одбраната, бидејќи прифатил дека е повлечена предложената листа на докази.

По неколку одложувања, повтореното судење го водеше судијата Ељведин Ферати, кој на возачот Пајазити му пресуди две години затвор, исто колку и Апелација. Премиерот Христијан Мицкоски изрази згрозеност од пресудата и го повика Судскиот совет да ја разгледа работата на судијата, а евентуалните негови критичари ги нарече „полноглавци“.

Судскиот совет веднаш го прифати предлогот и побара увид во предметот. Пресудата од две години затвор поттикна лелек за правда кај семејството на Теодора. Аргументите на одбраната беа дека таа кобна ноќ било облачно, на булеварот „Видое Смилевски Бато“ немало осветлување, а пешачкиот бил лошо обележан.

Како олеснителни околности при изрекувањето на пресудата биле земени тоа што обвинетиот бил неосудуван, дека е татко на две деца и старател на неговата сестра, која имала здравствени проблеми.

Семејството на Теодора изрази благодарност до премиерот Христијан Мицкоски, кој го повика Судскиот совет да го испита работењето на тетовскиот судија што на обвинетиот му досуди две години затвор за смртта на Теодора.

-Имаме сомнеж како семејство дека зад оваа пресуда стојат политика, мито и корупција. И натаму силно ќе се бориме за правда за Теодора. Исто така, јавно сакаме да прашаме зошто иницијативи како ‘Кој е следен’ немаат покажано никаков интерес за нашиот случај, а наводно се борат против трулиот и корумпиран систем. Ги немаше ниту на последното рочиште кога се изрече скандалозната одлука од само две години затвор за убиецот на Теодора. Сметаме дека е доста од лажни иницијативи со скриени агенди каде жртвите се само средство за постигнување на туѓи цели – напиша семејството во отвореното писмо.