Во Скопје нема соодветно уредена и пристојна сала за венчавки, а откако пред неколку години тие не се одржуваат во Триумфалната капија, идните младоженци имаат две опции – да склучат брак во некоја од службените простории на Управата за водење на матичните книги или да повикаат матичар во ресторанот каде што ја одржуваат свадбената веселба. Сепак, стерилноста и тесниот простор на матичните канцеларии ги одбиваат идните сопружници, иако тоа ги чини само 150 денари (100 денари – административна такса и 50 денари за образецот на изводот од матичната книга на венчаните).

Во последниве години сè повеќе бракови се склучуваат во специјализираните ресторани, што значи и зголемено излегување на матичарите на терен за време на викендите и на државните празници. Без разлика дали сакате да се венчате во хотел, во шума, во градината на вашата куќа или на плажа, таа ексцентричност чини пари. Според прецизната математика на Правилникот на УВМК, ако местото на венчавката е оддалечено до 10 километри, тоа задоволство чини околу 7.472 денари! Доколку вашиот избор е подалеку од 10 километри (што и не е реткост, бидејќи соодветните ресторани се лоцирани на периферијата на главникот град), тогаш цената на матичарот е зголемена за 100 проценти, односно околу 16.000 денари!

Венчавањето во ресторан не е задолжително и е по желба на младите и претставува еден вид луксуз, вели за „Слободен печат“ Емир Сулејмани, директор на Управата за водење матични книги, откако се интересиравме зошто има толку драстични разлики во цените на венчавките надвор од службените простории?

– Граѓаните имаат можност без финансиски оптоварувања за нив да се венчаат без надоместок во просториите на подрачните одделенија и канцеларии во состав на УВМК на целата територија на државата, за што се плаќа само 150 денари за Изводот од матичната книга на венчаните – објаснува директорот Сулејмани.

Тој потврдува дека венчавки не се вршат во Триумфалната капија, а граѓаните на Скопје имаат можност да се венчаат во просториите на ПО, како и во салите во состав на матичните одделенија во матичните подрачја на Скопје. Упатените велат дека во изминатава деценија освен граѓански сè повеќе млади се решаваат и за црковен брак, кој е дополнителна ставка во свадбениот биланс, бидејќи за венчавка во некои епархии се наплаќа 7.700 денари.

Како поегзотични места што идните брачни двојки ги избрале за да го кажат нивното „да“, биле Порта Македонија, Плоштадот во Скопје, Градскиот парк, Скопското кале, на брод среде Охридското Езеро, на Милениумскиот крст на Водно, во Ботаничката градина во Скопје, во Музејот на националната борба на македонскиот народ, позначајните манастири и цркви низ Македонија, како и во зимските туристички центри.

Инаку, надоместокот за склучување брак надвор од службените простории од понеделник до петок и првата работна сабота, по 16:30 часот, до 10 километри од матичното подрачје изнесува 3.368 денари. Нешто поскапо е склучувањето брак по работното време во работните денови и тоа чини 3.736 денари. Доколку, не дај боже, се предомислат или се спречени поради друга „виша сила“, идните сопружници треба да знаат дека нема да им бидат вратени парите уплатени за венчавка на терен.

Најмногу венчавки има во август, најмалку во ноември

Лани во Македонија биле склучени 12.882 бракови, покажуваат последните статистички податоци, и во споредба со претходната година нивниот број е намален за 3,4 отсто. Август е најомилениот месец за венчавки – 1.851 или 14,4 отсто од вкупната бројка, а најмалку склучени бракови се забележани во ноември – 761 или 5,9 отсто. Инаку, просечната возраст при склучување на прв брак е 27,4 години за невестата и 29,9 години за младоженецот.

Најчесто е стапувањето во прв брак со учество од 93,7 отсто за жените и 93,2 отсто за мажите. Податоците откриваат и уште еден интересен податок, а тоа е дека во втор брак со учество од 6,3 отсто и трет брак со учество 0,5 отсто, во вкупниот број на склучени бракови, почесто стапуваат мажите.

Во 2022 година најголем број бракови 4.263 или 33,1 отсто кај жените и 4.721 брак или 36,6 отсто кај мажите се случиле во старосната група од 25 до 29 години.

Венчавките поскапеа и во Србија и во Хрватска

Годишно во Србија се одржуваат околу 25.000 свадби, а годинава се зголемени цените за организирање свадбени веселби. Во Белград сите термини се резервирани до 2024 година. Годинава според српските медиуми излегувањето на матичарот на терен поради склучување брак во Белград чини над 8.000 денари и во споредба со 2022 година, оваа услуга е поскапена за 12,6 отсто. Оние двојки што се венчаваат во општинската зграда треба да издвојат околу 170 денари. Иако нема прецизни бројки за цената на венчавките во Хрватска, пресметките покажуваат дека било да се работи за матичар или за свештеник, треба да издвоите 1 отсто од својата пресметка за вкупната цена на свадбата за овој трошок. Хрватските медиуми пишуваат дека ни црковното венчавање не ја избегна инфлацијата и влезот во еврозоната, па така овој обред чини околу 50 евра, плус 200 евра за хор.