Суд во Мадагаскар осуди на хируршка кастрација маж кој силува дете во 2024 година, изјави судски службеник, што е првпат да се изрече таква казна во земјата.

Мажот е осуден за силување и обид за убиство на 6-годишно девојче во заедница оддалечена 30 километри од Антананариво, главниот град на Мадагаскар, изјави главниот обвинител на апелациониот суд каде што се одвиваше случајот.

„Лицето обвинето во овој случај беше осудено од судот на доживотен затвор со принудна работа и кастрација“, додаде тој во соопштението што Министерството за правда го сподели со медиумите.

„Денешната одлука претставува силен и важен одговор од судскиот систем што има за цел да послужи како предупредување за секој што има слични зли намери“, нагласи државниот обвинител.

Кастрацијата беше воведена во Мадагаскар минатата година како дел од законот насочен против силување малолетници на возраст од 10 години и помлади. Владата објасни дека го вовела законот бидејќи многу такви случаи се евидентирани од страна на судовите.

Хируршката кастрација се користи како казна за некои сексуални злосторства во Чешка и Германија, со согласност на осуденото лице. Луизијана минатата година стана првата американска држава што предвиде казна за сторители на некои сексуални злосторства во кои се вклучени малолетници.

Хемиската кастрација, која се спроведува со давање лекови и може да се поништи, е усвоена како казна за сексуални злосторства во неколку американски држави, како и во земји како Полска и Јужна Кореја. Велика Британија, исто така, размислува за нејзино усвојување.

Групите за човекови права велат дека обете практики се неетички и дека напорите треба да се фокусираат на охрабрување на жртвите на злоупотреба да пријават злоупотреба, заштита од одмазда и на пошироки напори за превенција.