Поранешната лидерка на Мјанмар и добитничка на Нобеловата награда за мир, Аунг Сан Су Чи и поранешниот претседател на земјата Вин Мајнт се помилувани за некои кривични дела за кои се осудени, а во согласност со тоа, нивните затворски казни се намалени, објавија денеска медиумите во таа земја.

Су Чи ќе биде помилувана за пет од 19-те кривични дела за кои е осудена на вкупно 33 години затвор, а ќе остане во домашен притвор, додека затворската казна ќе и биде намалена за шест години.

Радио и телевизија Мјанмар денеска го објави помилувањето, а неименуван добро информиран извор изјави дека Су Чи и Вин Мајнт ќе останат во притвор. Помилувањето би значело намалување на затворската казна за шест години, изјави портпаролот на хунтата Зав Мин Тун за Eleven media group.

„Воениот совет за државна администрација, исто така, го помилува поранешниот претседател Вин Минт, кој исто така беше уапсен во исто време со Су Чи по државниот удар во 2021 година, по некои од обвиненијата за кои беше осуден, што резултираше со намалување на казната за четири години“, изјави портпаролот на хунтата.

Су Чи, која минатата недела беше преместена од затвор во куќен притвор, е во притвор откако воената хунта ја презеде власта со државен удар на почетокот на 2021 година.

Су Чи е осудена за разни кривични дела, од поттикнување и изборна измама до корупција, и таа ги негира сите обвиненија. Су Чи (78), ќерката на херојот на независноста на Мјанмар, првпат беше ставена во домашен притвор во 1989 година по масовните протести против децениското воено владеење. Таа ја доби Нобеловата награда за мир во 1991 година за кампања за демократија, но беше целосно ослободена од домашен притвор дури во 2010 година. Су Чи победи на изборите во 2015 година што се одржаа во рамки на пробните воени реформи кои беа прекинати со државен удар во 2021 година.