Движењето „Студентски отпор“ преку соопштение демантира дека нивни претставници денеска биле на средба со пратенци на ВМРО-ДПМНЕ околу предлогот на партијата за Закон за субвенциониран студентски оброк, како што објавија медиуми блиски на опозициската партија.

„Јавноста ја информираме дека ова е само еден патетичен обид да се дискредитира и партиски да се обои движењето Студентски отпор! Луѓето што присуствуваа на таа средба не се наши членови, туку се членови на партискиот подмладок на ВМРО – ДПМНЕ, односно УМС“, велат од студентската организација.

„Студентски отпор“ во ниту еден случај не би седнал на иста маса со претставници од партијата која најмногу придонесе за уништување на студентскиот стандард во Македонија со енормна корупција и непотизам по универзитетите во Македонија“, велат од движењето.

„Нема да дозволиме борбата за подобар студентски стандард партиски да се обои од страна на една од најкриминогените партии во Македонија, а и пошироко“, додаваат во соопштението.