Студентите сместени во студентскиот дом „Пелагонија“ се обратија до редакцијата на „Слободен печат“ дека во женската зграда немаат топла вода во ноември, кога температурите се спуштаат и под нула. Од Студентскиот дом, пак,  велат дека мајстори работат на решавање на проблемот, но бидејќи сè уште нема директор, не можат сами да ги решаваат сите проблеми.

-Имено, на студентските маки им нема крај. Во „Пелагонија“ во женската зграда во ноември немаме топла вода. Не знам за што плаќаме, кој е студентскиот стандард да живееме како глувци? – пишува студентка.

„Слободен печат“ контактираше со вработени во студентскиот дом, кои потврдија дека нема топла вода и дека мајстори во моментот работат на решавање на проблемот.

Според неа, не работат пумпите за вода.

Од студентскиот дом велат дека се без директор и не можат сами да ги решаваат проблемите, а немаат земено плата од септември.

-Во септември земавме плата за јули и август и толку. Одговорот барајте го во Министерството за образование и наука, зошто досега не е поставен нов директор, бидејќи ние не можеме ништо да завршиме – додаде таа.

Според вработената, во „Пелагонија“ работат околу 50-60 луѓе, а сместени се околу 1.000 студенти.