За два дена завршува рокот за електронско пријавување за сместување во државните и приватните студентски домови низ Македонија за претстојната 2025/2026 академска година за студенти од втора и повисоките години на додипломски студии и за апсолвенти.

Рокот за пријавување за прием во студентските домови за студентите од прва година, пак, ќе почне на 10 септември, по завршувањето на уписниот рок на факултетите во август, и ќе трае до 17 септември.

Студентите кои ќе аплицираат за место во некој од студентските домови треба да пополнат електронска пријава и да ја прикачат соодветната документација на интернет-порталот  за електронски услуги.

Студентите може да конкурираат за прием само за еден студентски дом. Доколку по објавувањето на конечни списоци со примени студенти по државните домови ќе останат непополнети сместувачките капацитети во одреден дом, пријавувањето ќе продолжи сè до нивното пополнување, но најдоцна до 30 ноември 2025.

Според Конкурсот што го објави Министерството за образование и наука, слободни се вкупно 4264 места во студентски домови во Скопје, Штип, Битола, Тетово, Охрид и Прилеп. Од нив, 851 место се наменети за бруцоши, а 3413 места се за студенти од втора и повисоките години на студии.

Поради реновирање, затворени се домовите „Кузман Јосифовски-Питу“ и „Стив Наумов“ во Скопје кои, според најавите од МОН, повторно ќе примаат студенти напролет, со почетокот на вториот семестар од академската 2025/2026 година.

Со најмногу места во главниот град располага студентскиот дом „Гоце Делчев“ (1212), во ДСД „Пелагонија“ на располагање се 997 места и 335 во ДСД „Томе Стефановски Сениќ“.

Во ДСД „Кочо Рацин“ во Битола има вкупно 385 слободни места за сместување студенти, 242 се слободни во ДСД „Никола Карев“ во Охрид, 330 во ДСД „Орде Чопела“ во Прилеп.

Во Штип студентите може да изберат сместување во три дома: ДСД „Браќа Миладиновци“ (236 места) и во приватните ПСД „Хилјадников“ (60 места) и ПСД „Логос“ (52 места).

Два дома се на располагање во Тетово: државниот студентски дом „Тетово“ располага со вкупно 295 кревети и приватниот ПСД УЈИЕ – со вкупно 120 места.

Во Конкурсот на МОН се појаснети условите за прием на студенти во домовите, начинот на електронското пријавување, начинот на кој се врши распределбата на расположивите места, документите потребни за аплицирање, конкурсните рокови и постапката за прием во студентските домови.

Конечниот список за прием на студентите од втора и повисоките години ќе биде објавен најдоцна до 6 септември 2025 на огласните табли во студентскиот дом каде што конкурирал студентот и на веб-страницата на Министерството.
Приговорите по резултатите ќе се доставуваат во самиот дом каде што имаат аплицирано во рок од 10 дена од денот на објавувањето на резултатите.

Конечниот список за прием на студентите од прва година, пак, ќе биде објавен најдоцна до 30 септември 2025, а приговор ќе може да поднесат во рок од 10 дена од денот на објавувањето на резултатите.

Како што е наведено во објавениот Конкурс, студентите кои ќе бидат примени треба да се вселат почнувајќи од денот на потпишаниот договор со домот во кој се примени, но не подоцна од 10 дена од објавениот конечен список.