Селекторот на младинската машка ракометна репрезентација на Македонија, Радослав Стојановиќ, денеска го соопшти списокот на ракометари кои ќе бидат дел од подготовките за Светското првенство што следниот месец ќе се одржи во Полска.

Младинскиот национален тим ќе се собере на 5 мај во хотел „Карпош“ во Скопје, по што следуваат два контролни натпревари како дел од подготовките. Првиот е закажан за 8 мај против суперлигашот Бутел, а веќе следниот ден ќе следи нов тест со еден од тимовите Вардар или Пролет.

На списокот на Стојановиќ  нема неколку стандардни имиња како Иван Галевски, Александар Петковски, Дамјан Митев и Валентин Карасманакис, кои се повикани во сениорската репрезентација и ќе бидат дел од квалификациските натпревари за Европското првенство.

Се очекува Стојановиќ да ги искористи пријателските дуели за финално селектирање на ростерот што ќе патува на Светското првенство, каде Македонија ќе се обиде да направи силен настап и да го повтори успехот од минатите младински циклуси.