„Во Министерството за односи меѓу заедниците од утврдениот буџет за трошоци годинава потрошени се само 6,23% од вкупно одобрените средства за угостителски услуги. Расфрлањето со народните и државни пари е минато, раководството работи домаќински“, вели министерот Иван Стоилковиќ.

„Ако во минатото ова Министерство беше симбол за вулгарно трошење и играрии, сега очигледно е за одговорно работење. Нема повеќе расфрлање со народните пари на хедонизам, а фокусот веќе една година не е на трошоци за ќебапи и скапи ручеци, како и играње игри, па наместо да се трошат парите од граѓаните сега се работи за унапредување на сите заедници во земјава“, напиша Стоилковиќ на „Фејсбук“.

Тој се пофали дека за еден месец Министерството за односи меѓу заедниците потрошило „само 14.000 денари на ставка угостителски услуги“.

Во времето кога министер беше Артан Груби, ова министерство потроши 40.000 евра само за нарачки на храна од две ќебапчилници. Во 2023 година, според податоците од Бирото за јавни набавки, Министерството спровело тендер за угостителски услуги, на кој биле избрани две компании, секоја по 1.180.000 денари (приближно 20.000 евра). Најголемиот дел од средствата – 944.000 денари – биле доделени на компанијата „Пчела Ш.Е.Љ.“, која управува со ќебапчилница и барбекју бар во Старата скопска чаршија. „Пчела“ испорачала храна во вредност од 532.037 денари, додека втората избрана фирма, „Далма кетеринг“, не реализирала ниту една фактура од предвидените 220.000 денари.