Светската трговска организација (СТО) ја зголеми својата прогноза за растот на глобалната трговија во 2023 година, иако сè уште очекува забавување, предупредувајќи на ризиците кои произлегуваат од војната во Украина, геополитичките тензии, несигурноста на храната, инфлацијата и заострувањето на монетарната политика, објави Ројтерс. Организацијата предвидува дека обемот на трговијата со стоки ќе се зголеми за „незадоволителни“ 1,7 отсто во 2023 година. Во октомври прогнозата беше за раст од 1 процент.

Сепак, очекуваното ниво останува под просечното ниво од 2,6 отсто забележано во текот на 12 години откако обемот на трговијата падна по глобалната финансиска криза. Според СТО, за цела 2022 година, падот во последниот квартал од годината доведе до годишна стапка на раст од 2,7 отсто наспроти проектираните 3,5 отсто, пренесе БТА.

Организацијата очекува дека со забрзување на економскиот раст и закрепнување на растот на трговијата со стоки на 3,2 отсто во 2024 година, таа предупредува дека оваа прогноза е особено неизвесна и придружена со бројни ризици.

Генералниот директор на СТО, Нгози Оконџо-Ивеала рече дека заканите вклучуваат продолжување на војната во Украина и други тензични геополитички ситуации, дополнително забрзување на инфлацијата и влијанието на строгата монетарна политика.

Организацијата, исто така, рече дека богатите земји треба да внимаваат на знаци на криза со храна што може да доведе до глад во земјите со низок приход.

Не е јасно како војната ќе влијае на садењето земјоделски култури во Украина, која е главен производител на жито. Во исто време, поплавите или сушите предизвикани од климатските промени може да ги уништат културите на друго место.