Министерката за одбрана Славјанка Петровска вели дека уште во првиот момент кога се случија поплавите во Словенија, стапиле во контакт со надлежните и понудиле поддршка. Како што појаснува таа, од страна на Словенија било одговорено дека штом ќе ја направат анализата ќе бидат доставени барања. Во текот на вчерашниот ден, преку системот за помош и поддршка во кризни ситуации и на НАТО и ЕУ биле доставени барањата, а министерката, началникот на Генералштабот и претседателот на државата изреагирале веднаш и денеска на седница на Влада ќе бидат изгласани барањата.

Жалам што трагедијата во Словенија се искористи за лаги и шпекулации дека доцниме со помошта. Не сакавме да правиме голем ПР маркетинг, но еве дозволете да известам. Од првиот момент кога се случија поплавите, стапивме во контакт со колегата од Словенија, премиерот, претседателот и ја понудивме нашата несебична поддршка. Од нивна страна ни беше кажано дека штом ја направат анализата ќе бидат доставени барања и во текот на вчерашниот ден, преку системот за помош и поддршка во вакви кризни ситуации на НАТО и ЕУ беа доставени барања и затоа веднаш изреагиравме – одговори Петровска на прашањето дали Македонија доцни со помошта за Словенија.

Одлуката за испраќање помош, која се состои од 100 војници од различен состав, министерката информираше дека денеска ќе биде изгласана на владина седница.

Во барањето од Словенија се бараат 200 војници, а Македонија испраќа 100, или 50 отсто што значи дека останатите ќе ги покријат другите земји членки на НАТО, додава таа.

На прашањето кога ќе бидат испратени војниците, Петровска истакна дека се подготвени да заминат уште денеска, но во текот на попладнето ќе ги посети заедно со началникот за да се уверат дека се подготвени и тие сепак ќе заминат утре рано наутро.

Сега засега ова е тоа што е побарано, побарани се и други технички средства за која ние не сме во можност да одговориме, но секако ако се испратат барања на кои ќе можеме да одговориме ќе одговориме – додава министерката за одбрана.

Илјадници луѓе се евакуирани од своите домови низ северозападна и централна Словенија, а армијата, пожарникарите и спасувачите се обидуваат да ослободат други и да ги расчистат улиците.

Шест лица загинаа од петокот, меѓу кои и двајца холандски државјани. Словенечката агенција за животна средина објави дека поплавите вчера почнале да се повлекуваат, но некои области се уште се отсечени. Европската Унија понуди тешки машини и инженерски единици.

Словенија, исто така, побара хеликоптери, војници и монтажни мостови од воената алијанса на НАТО. Хрватска и Унгарија помогнаа со хеликоптери, а Германија со тим за цивилна заштита.