Балерината Стефанија Гаштарска е првата Македонка што стана дел од ансамблот на рускиот театар „Баљшој“ во Москва.

Осумнаесетгодишната балерина од Скопје настапи на сцената на овој театар уште пред две години во улога на принцезата Аурора од балетот „Заспаната убавица“.

Гаштарска заврши основно музичко училиште во „Илија Николовски-Луј“ во Скопје, а средното музичко училиште го заврши во Русија. Таа е првата македонска балерина што своето образование го заврши во престижната балетска академија „Баљшој“ со најдобри оценки.

Веста дека Гаштарска се вработи во театарот „Баљшој“, на социјалните медиуми ја споделија и од компанијата „Гришко“, производител на светски познати балетанки, чиј бренд-амбасадор е младата скопска балерина.

Таа е добитник на специјални дипломи за најдобар студент на академијата. Стефанија има многу настапи досега на сцената на театарот „Баљшој“, на концерти, на важни настани, на гала-концерти, гостуваше и во Атина со целовечерна претстава на „Оревокршачка“, каде што ја имаше главната улога. Турнејата ѝ беше организирана од Академијата.

Најважниот концерт оваа година ѝ беше во Калинград каде што настапуваше со најголемите ѕвезди на театарот „Баљшој“ на директна покана од самиот театар. Ова е историски успех за македонскиот балет и култура.

Стефанија е ќерка на балерината Марија Крстевска и на кошаркарот Димче Гаштарски.