Државната компанија Електрани на Северна Македонија (ЕСМ) најостро реагира на денешните изјави на портпаролот на ВМРО-ДПМНЕ Наум Стоилковски дека АД ЕСМ ги носи во стечај некои од своите ДООЕЛИ.

-Согласно потребите на работниот процес работата се организира со отворање на нови ДООЕЛИ и тоа Друштво за туризам, угостителство, рекреација и спорт ЕСМ МОЛИКА ДООЕЛ Битола и Друштво за туризам, угостителство, рекреација и спорт СКИ ЦЕНТАР ПОПОВА ШАПКА ДООЕЛ Тетово со цел да се обезбеди нивно поефикасно функционирање. ЕЛЕМ ТУРС е основан 2012 година за време на владеење на политичката партија која ги искажува овие невистини и истиот постојано работи со загуба поради лошо поставениот концепт, реагира АД Електрани на Северна Македонија.

Стоилковски претходно на прес конференција обвини дека „СДСМ го турка ЕЛЕМ ТУРС во стечај заради долгови, а на директор на ЕЛЕМ ТУРС му отвора нова фирма со имот на ЕЛЕМ ТУРС, Адем Авзиу кадар на ДУИ“.

-Како е можно ЕЛЕМ ТУРС да се затвора како непродуктивно, а истовремено за една од двете нови фирми, Ски Центар Попова Шапка, да се најавува стратешка инвестиција и долготрајна концесија? Уште повеќе, прв човек на новата фирма за која е најавена инвестиција, е токму досегашниот директор на турнатата фирма во стечај, Адем Авзиу? Како сега ќе знае да работи рентабилно со новата фирма, а не знаел со ЕЛЕМ ТУРС? Втората фирма – ЕСМ Молика е оставена на Миле Вељановски, сопартиец, личен пријател, семеен другар и шофер на Васко Ковачевски! Внимавајте, шоферот на Васко Ковачевски, добива и ќе водел државна фирма за угостителство и туризам, со капацитети во Дојран, Охрид, Струга, државната фирма ЕСМ Молика!?, рече Стоилковски и додаде дека се бркаат од работа 200 вработени, а останува неисплатен долг на доверители од околу 150 милиони денари.

Од ЕСМ реагираат дека до овој момент сите вработени без разлика дали се вработени во ЕСМ МОЛИКА ДООЕЛ Битола или во ЕЛЕМ ТУРС се со решен работен статус и истите редовно и уредно ќе земат плата за минатиот месец.

-Во врска со раководните лица кои управуваат со овие ДООЕЛИ истите не се назначени за директори туку се назначени како вршители на дејност, до целосно разрешување на процесот и стабилизација на двете друштва и повторно ќе напомениме, со единствена цел да се обезбедат можности новите ДООЕЛИ конечно да работат со добивка, соопшти АД ЕСМ.