Зоран Ставрески како екс министер за финансии дал согласност државата Македонија да се задолжи за 505 милиони американски долари преку Агенцијата за државни патишта за изградба на автопатот Кичево – Охрид. Проектот бил проценет на 555 милиони долари. Остатокот до таа сума требало да ги обезбеди Агенцијата за патишта.

Ова денеска се дозна на продолжението на судското рочиште за предметот на СЈО познат како „Траекторија”. Задолжувањето било кај кинеската „Екпорт импорт“ банка, а Кинезите барале државна гаранција, која ја дала македонската страна, а каматата била 2 отсто.

Според договорот кој во судница го објави обвинителката Лиле Стефанова, правно, позитивно мислење за договорот дало и македонското Министерство за правда.

Додека го читаше делот на договорот во кој се објаснува зошто било потребно да се изгради овој автопат, кој ќе допринесол и за развој на градежништвото во земјава, обвинителката Стефанова рече:

– Затоа некои брзале да формираат градежни фирми, алудирајќи на дел од македонските фирми кои учествуваат-учествувале во изградбата.