Станкоски: На годишно ниво преку Еразмус+ проекти волонтираат околу 350 луѓе од Македонија
Неколку студенти од цела Европа, со голема желба за истражување на светот и создавање пријателства, волонтираат во Волонтерскиот центар Скопје на кратки и долги проекти. Повеќе за мисијата на Волонтерскиот центар Скопје, ни објасни директорот Никола Станкоски. За какви проекти станува збор, зошто ја одбрале токму Македонија за нивен престој, открија волонтерите за „Слободен печат“.
Препорачано
Иницијативата за формирање на ВЦС ја покренал директорот Никола Станкоски поради љубопитноста за истражување на светот и можностите кои ги нуди. Со него зборувавме за желбата на младите за волонтирање.
-Во ВЦС волонтираат локални и меѓународни волонтери. Локалните волонтери се вклучени во разни настани во текот на целата година, кои ги организираме заедно со нашите партнери и соработници на национално и локално ниво. На годишно ниво преку проекти од Еразмус+ програмата се вклучени околу 350 луѓе од Македонија, а во моментов имаме 10 млади луѓе кои се тука за волонтирање во најразлични активности – вели директорот Станкоски.
Ања, Софија, Лилу, Јакуб и Стефан се волонтери во Волонтерскиот центар Скопје. Љубовта кон волонтирањето ги споила овие неколку младинци и ги довела во Скопје каде заедно волонтираат на проекти за ВЦС. Со нив разговаравме за нивната љубов кон волонтирањето, како се одлучиле да волонтираат токму во ВЦС, за нивното претходно искуство како волонтери и активностите во кои учествуваат.
Младинците потекнуваат од различни европски држави како Полска, Германија и Франција, а сите заедно уживаат во убавините на Македонија.
– Јас навистина сакав да истражам малку повеќе за Балканскиот регион и Македонија беше одличен избор поради тоа што се наоѓа речиси на средина и можеш да истражиш повеќе за регионот – вели Софија Абег, волонтерка од Германија.
Јакуб Покучињски, волонтер од Полска во ВЦС работи на проект кој опфаќа теми за социјалните мрежи, работа во невладини организации. Тој е навистина импресиониран од градот Скопје, особено од неговата архитектура.
– Проектот беше идеален за мене и бев навистина заинтересиран за Скопје, бидејќи е навистина необичен град, би рекол. Бил целосно уништен, а сега има комплетно нова архитектура, но е многу интересен бидејќи е микс од сè, па затоа бев особено заинтересиран да живеам во Скопје – вели тој.
