Претседателот на Србија, Александар Вучиќ, повторно најави летачки автомобили во Србија. Како што рече од Пекинг, очекува тоа да се случи до крајот на 2026 година.

– Водев разговори со Пенг. Очекувам дека тие во Кина ќе добијат лиценца за летачки автомобили, кои сега вредат околу 300.000 долари тука, што значи околу 270.000 евра. Верувам дека до 1 декември следната година ќе можеме да покажеме како функционираат летачките автомобили на територијата на Република Србија и дека ќе имаме примена и употреба за време на Специјализираниот изложбен салон во нашата земја – рече претседателот, додавајќи дека станува збор за летачки автомобили за кои разговарал и претходно, а дека тогаш имало потсмев, објави Србија данас.

Тој исто така изјави дека во Пекинг имал многу важни билатерални средби со повеќе од 10 светски лидери, како и со големи кинески компании заинтересирани за инвестирање во Србија, вклучувајќи ја и компанијата Xpeng која развива летачки автомобили.