Државната награда „Мито Хаџи Василев – Јасмин“ за 2023 година за остварување во областа на публицистиката ја доби музичкиот новинар Ненад Георгиевски, а наградата му беше врачена на свеченост во македонското Собрание на 21 декември 2023 година.

Тритомната колекција на музички интервјуа направени од Ненад Георгиевски со голем број реномирани, светски и домашни, музичари, фотографи, филмски режисери, новинари, а кои ги објави во книгите со наслов „Музика и муабети“, „Уште музика и муабети“ и „Уште музика, уште муабети“, му ја донесе државната награда „Мито Хаџи Василев – Јасмин“ за 2023 година за остварување во областа на публицистиката. Издавач на трите книги е „Полица“ од Скопје.

Влезот на Георгиевски во новинарството е базиран прво на љубовта кон музиката, а оттаму добивањето на значајната новинарска наградата има уште поголемо значење.

– Наградата ја доживувам како големо признание за љубовта и трудот што се влеани во трите книги. Со наградата мојата фела и, воопшто, општеството покажаа признавање на мојата работа и сметам дека, со тоа, на свој начин влијаат врз подигнувањето на стандардите на музичкото новинарство. Самите книги се сведоштва за сите тие луѓе што сум ги интервјуирал, за времињата кога разговорите се случиле, а од друга страна покажуваат колку далеку сум стигнал.

Интервјуата се многу важен дел од тоа што го работам. Зад нив има големо истражување, преслушување музика, но овозможуваа и голем ќеф во подготовките и во реализацијата. Бидејќи содржините не се хронолошки подредени, книгите нема јасно да покажат како сум еволуирал од ентузијаст во професионалец. Со првите успеси се вагаат работите што вредат, каков пристап да се преземе и да се изгради врз тоа. Но, секогаш почетната точка е што е она што самиот сакам да го прочитам во едно интервју или текст. Тоа е пристапот. Прво сум читател, слушател, некој кој обожува да посетува концерти или изложби, а на крајот сум новинар.

Почетоците датираат од 2001 година, кога, како колекционер на музика, почнав да објавувам по некој текст или интервју во локалните списанија и дневни весници. Не очекував дека ќе почнат да се отвораат работите и дека ова ќе биде една од работите со кои ќе се занимавам толку време. Тоа што ме мотивира е љубовта кон музиката и тој свет. Љубопитен сум по природа. Тоа е богат свет поврзан со други светови, како издаваштво, визуелни уметности, мода, историја, итн. Тоа е тоа што потоа доведе до работа во други држави, по други медиуми. Постојано се случува нешто ново и тоа ново го храни интересот – истакнува Георгиевски.

Во музичко-новинарската дејност тој е присутен веќе дваесет години, а реализацијата на интервјуата со светските музички ѕвезди претставуваше негов личен влог, иако во последниов период музичката критика, речиси, е истисната од домашните медиуми.

– Музичката критика како таква треба да претставува мост помеѓу слушателот и авторот. Таа нема една намена, туку повеќе. Но, во основа прави едно дело, дали тоа е филм, книга или било што друго, да бидат поразбирливи за луѓето, односно да помогнат читателите, меѓу останатото, да ја видат големата слика. Жално е што тој сегмент е исчезнат кај нас. Инаку, веќе 19 години пишувам за интернационалното списание „All About Jazz“, но пред извесно време ја открив платформата „Substack“, каде што објавувам текстови со поширок избор на теми, а не само за музика.

Таа страница се вика „Vintage Cafe“ и постои повеќе од една година. На некаков начин, тоа е мојот „Политикин забавник“ каде што објавувам текстови за книги, патувања, уметност, филмови, кафе. Станува збор за еден вид блог кој работи со претплата и самата заедница на „Substack“ е едно вистинско шаренило од луѓе кои пишуваат на најразлични теми или објавуваат поткасти. Со тоа на луѓе како мене им е овозможено да творат и да опстојат – објасни Ненад Георгиевски.

(Текстот е објавен во „Културен печат“ број 210, во печатеното издание на весникот „Слободен печат“ на 23-24.12.2023)