Најголем број корисници во Србија купуваат облека и спортски производи преку интернет, 69,8 отсто, а спортска опрема 28,5 отсто, покажува Годишното истражување за употребата на информациско-комуникациските технологии (ИКТ) во Србија, објавено од Републичкиот завод за статистика. Извештајот покажува и дека дури 18,6 отсто од испитаниците платиле за испорака на брза храна преку интернет во текот на трите месеци пред истражувањето, додека само 6,6 отсто нарачале книги и списанија на овој начин. Анкетирајќи 2.800 домаќинства и 2.800 поединци, РЗС спроведе истражување за употребата на ИКТ во Србија според методологијата на Евростат, објави порталот Данас.

Истражувањето е спроведено од 15 до 29 февруари 2024 година преку телефонско интервју. Според добиените резултати, 88,8 отсто од домаќинствата во Србија имаат интернет конекција, додека застапеноста на компјутерите е 73,4 отсто. Една од областите со кои беше поврзано истражувањето на РЗС беше – онлајн купувањето.

Процентот на корисници на Интернет кои никогаш не купиле или нарачале стоки или услуги преку Интернет е 24,2 отсто, се наведува во извештајот.

На прашањето каков вид на стоки купиле преку интернет за приватни цели во последните три месеци, најголем број од испитаниците – дури 69,8 проценти, одговориле – облека, вклучувајќи спортска, а потоа чевли или додатоци, како чанти и накит.

Следи набавката на спортска опрема, без спортска облека, која онлајн ја купиле 28,5 отсто од испитаниците.

Дури 18,6 отсто од испитаниците платиле за испорака на храна од ресторани, синџири за брза храна и угостителски услуги преку интернет, додека нешто помал процент – 18,3 отсто од анкетираните граѓани – нарачале мебел, домашна опрема како теписи или завеси или градинарски производи на интернет (алатки, растенија).