Носителот на изборната листа „Србија против насилството“, Мирослав Алексиќ, најави дека правниот тим на таа листа вечерва ќе поднесе колективен приговор до Републичката, Покраинската и Локалната изборна комисија со барање за, како што рече, поништување на изборите на сите избирачки места и на сите нивоа.

На третиот по ред протест пред Републичката изборна комисија (РИК) поради наводна изборна кражба, Алексиќ рече дека рокот за поднесување приговори до изборните комисии истекува вечерва во 20:00 часот, јави Бета.

„Нашите правници кои се во тие органи за спроведување на изборите ќе бараат поништување на изборите на сите нивоа“, изјави Алексиќ, кој заедно со носителката на изборната листа „Србија против насилството“ Мариника Тепиќ, штрајкува со глад од понеделникот навечер во просториите на РИК во Белград.

Демонстрантите на 20 декември, се собраа на покана на најголемата опозициска коалиција „Србија против насилство“, која на 18 декември поднесе барање до РИК за поништување на изборите во главниот град, тврдејќи дека победата на владејачката Српска напредна партија (СНС) во Белград е резултат на изборна кражба.

Улицата Крал Милан, каде се наоѓа РИК, е блокирана за сообраќај.

Насобраните демонстранти извикуваат „Крадци“ и „Избори“ и носат транспаренти на кои меѓу другото пишува „Предавство на народот и Србија“ и „Ги украдоа изборите и ја понижија Србија“.

На 20 декември во 20:00 часот истекува рокот за приговори поднесени до РИК и до другите изборни комисии.