Африканската држава Гана е во напредни преговори со Србија за обезбедување дел од 100.000 работни дозволи што Србија планира да ги издаде оваа година, пренесува Н1 телевизија, повикувајќи се на медиумите во Гана.

Ова е дел од предложениот договор за мобилност на работната сила, кој има за цел да создаде можности за вработување за младите Ганци и да ги продлабочи билатералните врски, објави Ганската новинска агенција.

Информациите беа објавени за време на заедничката прес-конференција во Акра од министерот за надворешни работи на Гана, Самуел Окуџет Аблаква, и министерот за надворешни работи на Србија, Марко Ѓуриќ, кој е во тридневна официјална посета на Гана.

Спогодбата за мобилност на работната сила е усогласена со пошироката стратегија за вработување на Гана и потрагата по меѓународни можности за растечката популација на образовани млади во земјата.

Медиумите во Гана пишуваат дека ова се вклопува и во напорите на Србија да ја одржи продуктивноста и економскиот раст, поради недостиг на работна сила поради пад на стапката на наталитет и намалување на работната сила.

Се очекува двете страни да формализираат неколку договори во наредните месеци, вклучително и Меморандум за разбирање за мобилност на работната сила.

„Србија има стареечко население и ќе има потреба од договор за мобилност на работната сила што ќе ја искористи целосно многу младата популација на Гана, со просечна возраст од 20 години“, рече Аблаква.

Тој додаде дека Гана сака да биде втората африканска земја, по Египет, која ќе формализира договор за мобилност на работната сила со Србија.

„Вака ги продлабочуваме односите меѓу луѓето и создаваме економски можности за сите наши луѓе на сите нивоа“, додаде Аблаква.

Се очекува Договорот за мобилност на работната сила да опфати сектори како што се градежништвото, здравството, ИКТ, земјоделството и услугите, индустрии на кои сè повеќе им е потребна млада, енергична и квалификувана работна сила во Србија и околниот регион.

Министерот Ѓуриќ го потврди планот за мобилност на работната сила, наведувајќи дека демографските предизвици на Србија бараат проактивно ангажирање со земјите кои имаат вишок млад човечки капитал.

„Со стареењето на населението, постои растечка потреба, растечка потреба, за размена и градење мостови меѓу нашите луѓе. Затоа разговаравме и за поврзување меѓу луѓето и ќе работиме на обезбедување поголема мобилност на работната сила меѓу нашите две земји“, рече тој.

Ѓуриќ истакна дека ваквите програми за размена и работни партнерства ќе обезбедат односите меѓу Гана и Србија да се развијат надвор од дипломатијата во практичен и продуктивен сојуз.