Најголем број регистрирани јахти во Црна Гора, 149, се во сопственост на граѓани или фирми од Србија, што е речиси секоја третина од вкупниот број, објави неделава Управата за поморска безбедност и управување со пристаништа на Црна Гора.

Според овие податоци, во Црна Гора заклучно со 1 октомври се регистрирани вкупно 494 јахти, односно 80 повеќе од крајот на минатата година, објави РТЦГ.

Државјаните на Србија годинава по бројот на јахти ги надминаа Русите, кои се на второ место со вкупно 125 јахти, додека државјани на Црна Гора регистрирале вкупно 69 пловни објекти.

Следуваат Украина и Соединетите Американски Држави со по 18 јахти, а меѓу водечките земји се Босна и Херцеговина со 13 и Германија со осум регистрирани пловни објекти, пренесува Танјуг.

Од вкупниот број на јахти, според видот на сопственоста, доминираат физички лица кои регистрирале 402 јахти, додека правните лица, односно фирмите регистрирале 92 јахти.