Kryeministri i Kosovës Albin Kurti në deklaratë për agjencinë franceze "AFP" njoftoi se do të kundërshtojë "të gjitha përpjekjet për të shantazhuar Perëndimin në lidhje me afatin për arritjen e marrëveshjes me Serbinë". Këto ditë po shtohet presioni i deputetëve amerikanë dhe evropianë ndaj Prishtinës për arritjen e marrëveshjes me Serbinë.

Sipas Kurtit, Kosova tani po përballet me një afat kohor për të arritur një lloj marrëveshjeje me Serbinë në mars, përkundër pengesave dhe mosmarrëveshjeve të shumta që ndikojnë negativisht në marrëdhëniet ndërmjet Beogradit dhe Prishtinës.

“Pengesa më e madhe është këmbëngulja e Beogradit dhe kërkimi i makinës së kohës. Ata duan të kthehen në kohë dhe kjo nuk është e mundur”, tha Kurti për AFP.

Sipas tij, “Kosova është shtet i pavarur dhe është më mirë që Serbia ta njohë”, duke shtuar se një veprim i tillë ndoshta do ta lehtësonte integrimin e Beogradit në Bashkimin Evropian. Kurti fajësoi Serbinë për "ngërçin", duke thënë se ishte "një autokraci që kultivon lidhje të ngushta me Moskën dhe vazhdon të destabilizojë Evropën Juglindore".

“AFP” thekson se Uashingtoni po mbështetet tek Kurti që të dorëzohet në çështjet kyçe dhe rikujton se ambasada amerikane në Prishtinë këtë javë ka kërkuar fillimin e menjëhershëm të punës për formimin e Këshillit të Sigurimit.

Po ashtu, agjencia thekson se Kurti nuk ka marrë pjesë në takimin në ambasadën amerikane, gjë që tregon për rritje të tensioneve me Shtetet e Bashkuara, si aleate të Kosovës.

“Ne nuk mund të shantazhohemi. Nuk duhet të kemi frikë. Ne jemi njerëz të guximshëm dhe ajo që kërkojmë është trajtim i drejtë, trajtim i barabartë dhe njohje reciproke”, ka përsëritur Kurti.

Ai tha gjithashtu se "nuk është e drejtë të bëhet presion mbi vendin më pro-evropian, pro-amerikan dhe më demokratik në Ballkanin Perëndimor", dhe shtoi se ai presion duhet të drejtohet në Beograd.

Edhe “France Press” bën të ditur se presidenti serb Aleksandar Vuќi. në fjalimin e tij drejtuar qytetarëve tha se ka marrë ultimatum nga vendet perëndimore që të normalizohen marrëdhëniet me Kosovën ose të përballen me masa që do t'i shkaktojnë dëme të mëdha vendit.

“Në pamje të parë duket shumë e pamundur që Kurti dhe Vuçiq të jenë liderët që do të arrijnë marrëveshje dhe presidenti i Serbisë publikisht e quajti homologun e tij kosovar “llum terrorist”, shkruan “France Presse”.

“Mund të flas për qëndrimet e presidentit të Serbisë, por jo për arsimimin e tij”, tha atëherë Kurti.