Вчера започна првиот спортски камп за лица со попреченост во Ресен, а во текот на петте дена исто така ќе се одржи и обука за животни вештини за лицата со попреченост.

Работилницата за „Life Skills“ (Животни вештини) ќе ја одржи Владо Караев. Целта на овој проект е социјална инклузија на лица со попреченост, која се постигнува преку спортски активности, односно да се овозможи полесна и квалитетна интеграција на лицата со попреченост во општеството и општествените текови.

Проектот „Спорт за сите“ е иницијатива на неколку здруженија кои делуваат во полето на социјалната инклузија на маргинализираните општествени групи, како деца и млади лица со попреченост, но и непосредно лица постари од 55 години и самохрани родители.

Здружението на граѓани за адаптивни спортови и рехабилитација „Рекреакција“ е носител на проектот, партнери се Здружение на граѓани „Ресурсен центар на родители на деца со посебни потреби“, Здружение на граѓани со параплегија и квадриплегија „Без ограничувања“ и Здружението „Преспа Бајк – Ресен“.

Во рамките на проектот „Спорт за сите“ како дел на Регионалната програма за локална демократија во Западен Балкан (ReLOaD), финансирана од страна на Европската унијa, а спроведувана од Програмата за развој на Обединетите нации. Во проектот како ко-финансиер со свои средства учествува и Општина Ресен. Времетраењето на проектот е осум месеци, од август 2019 до март 2020 година.