– Сирија денес ги објави прелиминарните резултати од индиректните избори за првиот парламент по соборувањето на Башар ал-Асад минатата година, во кои мнозинството ќе бидат сунитски муслимани, со многу мало присуство на жени и религиозни малцинства, објавува Ројтерс.

Околу 6.000 членови на регионалните изборни колегиуми гласаа во недела, избирајќи кандидати од претходно одобрени листи, како дел од процес што ќе пополни речиси две третини од новото тело од 210 места.
Сирискиот претседател Ахмед ал-Шара подоцна ќе ја избере преостанатата третина.
Во деновите пред гласањето, аналитичарите и некои Сиријци изразија загриженост дека изборниот процес бил премногу централизиран и дека прекинувањето на изборите во областите надвор од владина контрола значи дека сите заедници не биле праведно застапени.

Според прелиминарните резултати, кои беа објавени денес, изборната комисија на Сирија објави дека се избрани 119 пратеници, но не прецизираше колку гласови добил секој од нив.

Според Ројтерс, што беше потврдено од набљудувачите на изборите, шест нови пратеници се жени.
Набљудувачите рекоа дека вкупно 10 места им припаднале на религиозните и етничките малцинства, вклучувајќи Курди, христијани и двајца Алавити, сектата на која ѝ припаѓа Асад.

Еден набљудувач го опиша новиот парламент како претежно сунитски муслимански и машки.
Навар Наџма, портпарол на повисокиот изборен комитет на Сирија, на прес-конференција беше прашан конкретно за застапеноста на жените и христијаните.

„Меѓу најзначајните недостатоци на изборниот процес беа незадоволителните достигнувања во однос на застапеноста на жените во Сирија, како и фактот дека христијанската застапеност е ограничена на две места, што е слаба застапеност во споредба со бројот на христијани во Сирија“, рече тој.

Наџма рече дека верува оти Шара ќе се обиде да ги исправи недостатоците кога ќе ги назначи преостанатите 70 пратеници.

Властите велат дека прибегнале кон индиректен систем на гласање поради недостаток на сигурни податоци за населението по војната, која одзеде стотици илјади животи од Сиријци и расели милиони.

Наведувајќи безбедносни и политички причини, властите го одложија гласањето во областите надвор од контрола на владата, вклучувајќи ги курдските области во северна и североисточна Сирија, како и покраината Свеида, која ја држи малцинството Друзи, оставајќи 21 место празни.

Парламентот под Асад беше малку поголем, со 250 места, од кои две третини беа резервирани за членови на неговата партија Баас.