Епархијата новограчаничка -среднозападноамериканска на Српската православна црква му додели орден Свети владика Мардариј на осудениот воен злосторник и лидер на Српската радикална партија Воислав Шешељ, соопштија денеска од партијата, пренесе Н1.

Орденот во име на владиката Лонгин на Шешељ му го додели бачкискиот епископ Иринеј, кој, како што се наведува во соопштението, по тој повод рече дека му припаднала „дел од честа и пријатната должност да му го врачи овој прекрасен орден во името на пречесниот епископ Лонгин, направен во името на еден чудесниот Божји угодник, светител, нашиот речиси современик, Светиот брат Мардариј“.

Шешељ рече дека му претставува големо задоволство и чест што тој „како недостоен“ ја добива оваа висока црковна награда“, се вели во соопштението на СРС.

Радикалниот лидер додаде дека кога еднаш престојувал во Америка, Канада и Австралија, ги затекнал Србите таму „поделени, закарани до крв и нож“.

„Се обидов, на секое место каде што престојував, да го надминам тој раскол, врквата повторно да се обедини и бев доста успешен. Српската црква, патријархот Павле го прошири патот за тоа да се постигне“, рече Шешељ.

Воислав Шешељ со правосилната пресуда на Хашкиот суд во 2018 година беше осуден на десет години затвор за поттикнување на прогон, депортација и принудно раселување и преселување на Хрватите во војводинското село Хртковци во 1992 година.