Министерот за внатрешни работи Оливер Спасовски на својот Фејсбук профил му се заблагодари на Зоран Заев за работите и политиките низ кои тие поминаа во изминативе години.

Оние кои ме познаваат знаат дека не сум љубител на реминисценции. Но крајот на годината вообичаено е време за некаква ретроспектива. Би рекол, сосема природно, бидејќи ако не се потсетиме на тоа што поминало – како сме го пресретнале, дали соодветно сме одговориле, дали сме можеле повеќе и подобро или сме се дале со најдобрата верзија од себе – нема да можеме да бидеме подобри. Кога на тоа ќе ги додадам и актуелните случувања на политичката сцена, навираат спомени од едно време-невреме, враќајќи ме во период со изместени вредности во општеството, во којшто исклучоците станаа правила, а правилата исклучоци, напиша Спасовски.

Тој ги напиша „клучните“ настани од изминативе години, во кои премиер беше Зоран Заев.

Се разбуди надежта, желбата за нешто поинакво, светлото кое го навести крајот од тунелот – 17 мај, денот кога се одржа најголемиот протестен митинг во историјата на нашата земја, митинг на кој учествуваа сите, без разлика на верска, етничка и национална припадност. Едноставно, сите кои се почувствуваа понижени, доведени до ѕидот – ја донесоа новата перспектива – големиот сенароден митинг и, по него, Кампот на слободата во времетраење на 60 дена. И повторно, ЗАЕДНО со Зоран Заев стигнавме до слободата!, вели Спасовски