Министерот за внатрешни работи Оливер Спасовски денеска објави детали за случајот со апсењето на пејачот Ламбе Алабаковски, уапсен за потпалувањето на пожарот во клубот „Иван Михаилов“ во Битола. Министерот остана доследен да не го именува сторителот туку ги користеше само неговите иницијали Л.А.

– МВР во Битола имаше опсежни активност, се преземаа многу криминалистички активности во овој дел, беа извршени многу службени разговори. Се прегледаа многу материјал од материјал од видео надзорот не само од објектот туку на повеќе објекти и на основа на сите податоци и информации дојдовме до сторителот на ова кривично дело, рече Спасовски во изјавата пред полициската станица во Охрид.

Тој додаде дека доцна синоќа по наредба на надлежниот суд, по предлог на СВР Битола и надлежниот обвинител е извршен претрес во објектите на сторителот при што се пронајдени несоборливи докази за извршувањето на кривичното дело од страна на осомничениот.

– Извршен е претрес во домот и во некои други објекти кои ги користи или се сопственост на сторителот на кривичното дело, притоа се пронајдени облеката и други предмети кои се доведуваат во врска со кривичното дело, тоа значи дека имаме неспорни и несоборливи докази. Лицето е приведено во полициска станица и во моментов очекуваме дека ќе биде изведено пред надлежен судија на претходна постапка. МВР бара одредување на мерка притвор заради тоа што се исполнети условите во однос на ваквото барање. Сепак но би сакал да почекаме на одлука на надлежниот суд, зошто сепак е тоа одлука на суд која мора да биде донесена, рече министерот Спасовски.

Тој додаде дека брзото расчистување на овој случај е важно за граѓаните и показател дека институциите функционираат. Иако постојат повици да се ослободи уапсениот потпалувач, Спасовски нагласи дека и за тоа постојат одредби во Кривичниот законик.

– Нема кривично дело кое може да биде дозволено или може да биде оправдано од било кој аспект. Дури и да има некакво опоравдување за тоа постојат норми во Кривичниот законик. Важно е дека институциите функционираат и тоа е важно за граѓаните зошто ако сакаме да имаме правда мора да имаме функционални институции, да работат и на основа на сето она ќе го дознаат, документираат и ќе биде фактички утврдено, да бидат поднесени соодветните кривични пријави, дециден е Спасовски.

Кој е Ламбе Алабаковски: Замина за Америка кога беше на врвот, се врати за да продолжи таму каде што застана