Јавното обвинителство може да отвори истрага и да ги провери податоците за тоа како Дрин Ахмети, внук на лидерот на ДУИ се стекнал со 39 отсто од сопственоста на Трговскиот центар „Соравија“, изјави министерот за внатрешни работи Оливер Спасовски. Тој вели дека ваквите информации и податоци даваат можност да се отвори постапка за проверка.

Прашан дали ќе има некаква одговорност, министерот изјави дека се што произлегува и е спротивно на законите мора да има одговорност, без разлика дали се работи за политичари.

Мораме сите да бидеме еднакви и да нема селективност во спроведувањ на правдата. Моралната одговорност е работа на премиерот. Тој оценува накој начин ќе се спроведат ваквите активност, додаде Спасовски.

Внукот на Ахмети ќе добие 39 отсто од сопственоста на „Соравија“, зделката нема конкретна цена

Споменувањето на името на внукот на Ахмети во јавноста предизвика лавина коментари, но неговиот внук, како и партнерите во оваа бизнис-зделка се категорични дека во неа нема ни грам политика, политичко влијание, и дека е само резултат на бизнис-интереси на успешни луѓе.

Ахмети објасни дека тој, заедно со неговиот партнер Пјетерѓокај, всушност го преземаат долгот, но истовремено земаат и кредитна линија. На новинарското инсистирање колку пари точно се дадени преку неговата фирма за преземање на 39 отсто од „Соравија“, тој не кажува износ за преземање, туку објаснува дека е преземен долгот од 20 милиони евра и е земена кредитна линија од 6 милиони евра, благодарение на Пјетерѓокај, кој, пак, е мнозински акционер во „Крединс банка“ од Албанија, која ја даде кредитната линија.