Министерот за внатрешни работи Оливер Спасовски вели дека националниот фронт за борба против корупција, не значи формирање нова институција, ниту збир од институции кои ќе се борат против корупцијата, туку воспоставување механизам на функционирање на сите подеднакво во целиот тој процес на преземање на активности и отстранување на недостатоците во сите сегменти, во МВР, во Јавно обвинителство, во судството.

– Еве, ние на пример, сега разговараме и преку еден ИПАРД проект во којшто работиме исклучиво за финансиските истраги, и ги согледавме сите недостатоци на нашиот систем. Многу процесни дејствија коишто се преземаат во предистражната и истражната постапка, треба да бидат забрзани, да бидат скратени. Треба да бидеме ефикасни. И најважно од се што е – институциите за спроведувањето на Законот да функционираат под иста процедура, рече Спасовски во дневникот на „Сител“.

Според него, борбата против криминалот и корупцијата во очите на јавноста ќе биде ефикасна, само ако има краен исход, што вклучува извршување на судските пресуди и одземање на имот ако тој бил стекнат криминално.

– Секаде каде што има пречки на патот од еден ваков аспект, треба да бидат отстранети. Тоа е наша задача, истакна Спасовски.

За случаите на струшкиот градоначалник Рамиз Мерко, за внукот на Али Ахмети, Дрин Ахмети, Спасовски рече дека МВР не прави селекција меѓу функционерите и обичните граѓани.

– Така што, и во оваа ситуација ние дадовме информации дека сме постапувале по предмети. И секогаш кога ќе биде побарано од МВР за кого било да се постапува да се собираат докази да се предадат на ЈО, тоа ќе го направиме, нагласи Спасовски.

На прашањето за очекувањата околу уставните измени, Спасовски истакна дека ова е клучниот политички момент не само за исчекорувањето во евроатлантските процеси на Република Северна Македонија, туку генерално на целиот регион.

– Мислам дека сега одредени состојби, геостратешките политики и испреплетувањето на интересите, од една страна покажаа дека Европа не може да биде целосно консолидирана доколку земјите од Западен Балкан не бидат дел од Европската Унија и тоа создаде еден поголем интерес за интеграција на Република Северна Македонија и на државите од регионот генерално и мислам дека тој момент мора да биде искористен. А за да биде искористен не треба само декларативни изјави и кажувања за тоа што ние сакаме и посакуваме како политички водства и генерално политички партии, туку тоа треба да го покажеме пред граѓаните. Мислам дека кога се зборува за национални интереси, а еден од клучните национални интереси е Република Северна Македонија да биде дел од европското семејство тука нема ниту политика ниту политикантство, тука треба да се гледа интересот на државата и на граѓаните, истакна Спасовски.