Ракометарките на Шпанија со победата од 27:23 над Хрватска во второто коло од главната рунда, обезбедија пласман на четртфиналето на женскиот ракометен Мундијал кој се игра токму во Шпанија.

Покрај Шпанија, пласман во четвртфиналето од групите 3 и 4 обезбедија уште и Германија, Данска и Бразил.

Хрватска беше рамноправен противникк само до завршницата на првиот дел по што Шпанките со добра игра во одбраната направија серија од 3:0 и на одмор заминаа со водство од 12:9. Во вториот дел, домаќинот на Мундијалот имаше целосна контрола над играта и резултатот и без проблеми дојде до триумф од 27:23 кој ги однесе во четвртфиналето.

Барбоса со шест и Кампос и Еспинола со по четири гола беа најдобри кај Шпанија, додека во редовите на Хрватска се истакнаа Блажевиќ со седум и Дебелиќ со четири постигнати голови.

Претходно, триумф вреден пласман во четвртфиналето оствари и Бразил и тоа над Аргентина со 24:19.
Во групата 3, Германија со 37:28 ја победи Јужна Кореја, додека Данска и дозволи на Чешка да постигне само 14 гола за 60 минути (29:14).

Резултати:
Група 3
Германија – Ј. Кореја 37:28
Унгарија – Конго 30:22
Данска – Чешка 29:14
Табела: Германија 8, Данска 8, Ј. Кореја 4, Унгарија 4, Чешка 0, Конго 0.

Група 4
Бразил – Аргентина 24:19
Шпанија – Хрватска 27:23
Јапонија – Австрија 32:30
Табела: Бразил 8, Шпанија 8, Јапонија 4, Хрватска 2, Аргентина 2, Австрија 0.