Советот на Општина Карпош на седницата која ќе се одржи во вторник, на 10 мај, треба да го утврди надоместокот што ќе се плаќа за градежно неизградено земјиште за населените места на подрачјето на општината, односно за селата Бардовци, Злокуќани и Горно Нерези, како и за населените места вон границите на ГУП на Град Скопје, кои претставуваат делови од неколку катастарски општини.

Според доставената Предлог -одлука до советниците, за изградба на стопански објекти од лесна индустрија, земјоделски објекти, сервиси, работилници, магацини, здравствени, деловни, комерцијални, е – инфраструктура и други објекти се предвидува комунална такса во износ од околу 4.310 денари за метар квадратен нето развиена површина. Сума од 3.078,69 за метар квадратен ќе се плаќа за изградба на станбени објекти – семејни или заеднички .

За изградба на училишта, болници, клиники, здравствени станици, амбуланти, аптеки, потоа за објекти од областа на културата и уметноста, шумарството, градежништвото и друго, комуналната такса ќе изнесува 2.767,37 денари за метар квадратен нето развиена површина, доколку не се одлободени од обврската за плаќање со Закон. Комунална такса се утврдува и за изградба на гаражи, летни кујни, настрешници и таа ќе изнесува околу 615 денари за метар квадратен.

Подносителот на барањето врши уплата на жиро сметка на Буџетот на Општина Карпош, врз основа на изготвена пресметка од страна на Секторот за урбанизам на Општина Карпош – се вели во предложената одлука, каде е прецизирано и дека овие средства се плаќаат еднократно, дека се приход на Општината и дека наменски ќе се користат за комунални дејности
кои се содржани во Програмата за уредување на градежно земјиште на подрачјето на Општина Карпош.