На последната седница на Советот на Општина Битола, којашто сè уште е топ тема во битолската јавност, објаснувајќи ги последните случувања во Советот, советникот на независната листа „Поинаку“ Иван Чулакоски рече дека тие се резултат на резултатите на локалните избори на којшто според него никој не победил.

-Тоа е историски момент, бидејќи никогаш Битолскиот совет не бил толку шаренолик, и никогаш толку во Советот не се дебатирало на толку многу теми. Јас повеќе од сигурен дека доколку некоја од партиите ќе имаше 18 советници, како што беше пракса во изминатите 30 години, ниту Габриела Илиевска ќе беше претседател на Советот, ниту амандмани ќе се видеа, ќе си теравте по свое и по своите партиски агенди, меѓутоа сега некој ви смета во извршувањето на вашите партиски наредби. Ние како независни советници нема повеќе да дозволиме битолчани да трпат било какви тортури. Во оваа прилика сакам јавно да им се извинам на битолчани што мислев дека можеме нешто заеднички да сработиме, но, праксата покажува дека не може да ви се верува. Ние не ја кочиме работата на Советот како што ни се префрла. Овде никогаш досега не се изгласале толку работи со поддршка на сите советници-рече од говорницата советникот на „Поинаку“ Иван Чулакоски кој повикувајќи се на принципот на работењето на Општина Кавадарци излезе со конкретен предлог истиот да се примени и во Битола.

Во Кавадарци постои служба во Општината што се вика „Мој општинар“. Тоа се вработени во Општината кои секојдневно се излезени по улиците во Кавадарци да ги евидентираат проблемите на граѓаните, ги пренесуваат до институциите и јавните претпријатија, сите заеднички работат на решавање на проблемите. Бидејќи од сите советници 90 отсто се вработени во државни служби и претпријатија и постојано се мавтате со кошулите низ градот предлагам и ние сите советници да формираме работно тело или комисија и да се поделиме реонски да ги бележиме и решаваме проблемите на битолчани и секој советник да одговара за својот реон дали проблемите ќе се решат или не. Зошто само ние од „Поинаку“ да бидеме виновни за се, туку да направиме таква организација па ако не работите, граѓаните да ве плукаат и вас, а не само нас од „Поинаку“-рече од говорницата советникот на независната листа на „Поинаку“, Иван Чулакоски.

На ваквата дискусија на советникот на „Поинаку“ Чулакоски, реплицираше координатор на советничката група на ВМРО-ДПМНЕ и заменик градоначалник на Битола, Бојан Бојкоски.

Рековте дека не знаете кој победил на Локалните избори во Битола. Вие од „Поинаку“ имате тројца советници а ние од ВМРО-ДПМНЕ имаме 13 советници. Мислам дека ви е јасно дека 13 е повеќе од 3. И сега, вие дојдовте како учител да ни давате обврски. Тоа ќе можете да го правите кога ќе бидете градоначалник, или ќе ни бидете работодавец, тогаш ќе можете да делегирате задачи. Овде во Советот не можете да ни кажувате кој од советниците што треба да работи. Што се замислувате вие овде? Мислите дека сте над нас овде во Советот? Сите тука сме исти-му реплицираше на Чулакоски, заменик градоначалникот на Битола и координатор на ВМРО-ДПМНЕ Бојан Бојкоски.

Дискусијата на довчерашните неформални коалициски партнери е само уште една потврда дека разидувањата меѓу советничките групи на „Поинаку“ и ВМРО ДПМНЕ се големи и тешко дека ќе дојде до нивно помирување.

Нивните разидувања, кои советничката група на СДСМ умешно ги користи, доведоа до целосна блокада на Општина Битола.