Бугарските медиуми објавуваат дека во населбата Капиштец во Скопје во петокот бил нападнат скопјанец со двојно, македонско и бугарско државјанство од страна на полицајци кои наводно ги прекршиле неговите права при апсењето. Случајот стигнал до бугарската амбасада во Скопје и до бугарското МНР во Софија, иако од македонското МНР велат дека скопјанецот под дејство на алкохол го нарушил јавниот ред и мир во два наврати, го нападнал и соседот и лажно пријавил дека тој бил нападнат. Поради агресивното однесување бил задржан во полициската станица и за тоа ќе му биде поднесена соодветна пријава.

„Станува збор за лицето Борче Нацевски кој имал кавга со соседот на тема ‘Зошто Борче е Бугарин?‘. Борче повикал полиција која потоа го одвела Нацевски. Го носат на трезнење. А бидејќи не бил пијан, полицијата го привела со патролното возило во близина на полициската станица Беко, каде што двајца полицајци (Филип и Х. Халили) го претепале. Мажот бил затворен во ќелија, од која неколку часа подоцна бил пуштен, претепан и без обвинение“, пишуваат бугарските медиуми користејќи ја објавата од фондацијата „Македонија“.

Од бугарското МНР потврдуваат за бугарските медиуми дека се во контакт со мажот, а за настанот претходно била известена и амбасадата на Бугарија во Скопје, односно тој имал средба со конзулот Димитар Грозданов.

„Амбасадата го следи развојот на случајот, преземајќи ги неопходните чекори за расветлување на околностите околу инцидентот“, соопштија од официјална Софија.

Македонското МВР покрена истрага за случајот во кој како што тврдат, полицијата дејствувала по пријава поднесена од страна на лицето Б.Н. (42) против неговиот сосед и бил затекнат со повреди кои сам си ги нанел во кавгата со соседот.

„На 01.11.2024 во 20.40 часот во кругот на Комплексот клиники „Мајка Тереза“, полициски службеници од Полициската станица Центар го лишиле од слобода Б.Н.(42) од Скопје затоа што го нарушил јавниот ред и мир по член 4 и член 6 од Законот за прекршоци против јавниот ред и мир и упатувал закани кон негов сосед. Претходно, тој пријавил дека во влезот од зградата во која живее бил нападнат со остар предмет од негов сосед, а откако полициски службеници излегле на местото било констатирано дека повредите си ги нанел сам со удирање по ѕидовите од ходникот во зградата и лифтот. Тој бил пренесен во Комплексот клиники ‘Мајка Тереза‘, каде му била укажана помош, а откако излегол, го нарушил јавниот ред и мир и бил приведен“, соопшти МВР.

МВР соопшти дека по целосно документирање на случајот против него ќе биде поднесен соодветен поднесок.

Случајот за кој непотребно реагираат бугарските власти, бидејќи лицето пред сè е македонски државјанин кое живее во Скопје дополнително ги влошува и онака нарушените македонско – бугарските односи кои се очекува барем делумно да се решат откако во Софија ќе се формира регуларен владин кабинет по изборите на 27 октомври.