Инвестицискиот фонд Катар Спортс Инвестментс, сопствениците на ПСЖ покажаа голем интерес за преземање на шпанскиот фудбалски второлигашки клуб Малага, пренесуваат шпанските медиуми.

Шпанскиот клуб моментно е во сопственост на групацијата за хотели и недвижнини БлуБеј и катарскиот бизнисмен Абдула Ал Тани, но клубот го води стечаен управник поради финансиски проблеми.

Според пишувањата на медиумите, преговорите се во завршна фаза, а целата трансакција би изнесувала околу 100 милиони евра.

Катар Спорт Инвестментс поседува околу 87 отсто од акциите на ПСЖ и 21,7 отсто од португалскиот клуб Брага.

Малага играше во четвртфиналето на Лига Европа во 2003 година, а 10 години подоцна во четвртфиналето на Лигата на шампионите. Се наоѓа на 15 место во Сегунда со 42 бодови, седум повеќе од зоната за испаѓање.