Општина Охрид упати јавен повик до сопствениците на кајчињата, да ги отстранат од крајбрежниот појас на езерото, на потегот кај Сараиште во Стариот дел на градот и долж крајбрежјето на туристичката населба Пештани.

Рокот истекува утре, во спротивно в сабота екипи на општинските јавни претпријатија ќе започнат акција за нивно отстранување.

Трошоците, како што соопштија локалните власти, ќе паднат на товар на сопствениците.

Во повикот се нагласува дека пловните објекти треба да се отстранат поради тековно одржување и чистење на крајбрежјето, со цел непречено користење од страна на жителите и туристите.