Во просториите на Сојузот на композиторите на Македонија (СОКОМ), на 6 декември, во 13 часот, ќе се одржи промоција на три нови албуми. Ќе се промовираат „Историски снимки со дела од историско значење“, во кој се вклучени повеќе автори, авторскиот албум „Од композиторскиот опус на Борис Светиев“, како и аудиоприлогот кон списанието „Премин“ со наслов „Црковното пеење од словенско-византиската традиција во Македонија“, во изведба на хорот на „Танец“.

Изданието „Историски снимки со дела од историско значење“ е албум со аудиоснимки од архивата на Македонската радио-телевизија и содржи тонски записи на дела на композиторите Кирил Македонски, Живко Фирфов, Благоја Ивановски, Ладислав Палфи и Тихомир Карапанчевски.

За овие снимки до неодамна не се знаело дека постојат, зашто некои од нив ги немало ниту во пописот на нивните автори, каков што е случајот со снимките на композициите на Живко Фирфов и Ладислав Палфи, кој се јавува и како диригент на Словенечката филхармонија.

Уште еден ексклузивитет е и тоа што сите записи главно се направени пред седумдесетина години, на самите почетоци на тонското снимање кај нас. Исто така, сите изведувачи, без исклучок, не се повеќе меѓу нас. Неговото издавање е поддржано од Министерството за култура на РСМ.

Дебитантскиот албум на Борис Светиев е уште едно издание од едицијата на СОКОМ посветена на авторските опуси на македонските композитори. Содржи седум дела од творештвото на Светиев за разни изведувачки состави. Изданието е заеднички проект на СОКОМ и Балканскиот музички форум, а е поддржано од Министерството за култура на РСМ.

Аудиоприлогот кон списанието „Премин“, периодична публикација на Струмичката епархија, е снимка на целовечерниот концерт на хорот на „Танец“ во рамките на годинашните Денови на македонската музика.

Во овој аудиоматеријал се наоѓаат композициите на Јоан Хармосин Охридски, Јован Кукузел, Јанаки Стојменович, Андон Шахпаски, Манасиј Поп Тодоров, Васил Иванов – Бојаџиев, Јане Коџабашија и други црковни дејци, кои беа премиерно изведени од хорот на „Танец“ на ДММ 2023, под раководство на м-р Гоце Цоневски, а во стручна соработка со д-р Мирјана Павловска Шулајковска и д-р Јане Коџабашија.

Концертот беше одржан во Музејот на македонската револуционерна борба, каде „Танец“ за првпат во своите 74 години постоење изведе концерт на словенско-византиско пеење, со што ја отслика тесната врска меѓу македонската фолклорна и црковна вокална практика.