По бурните реакции и осуди во јавноста дека Собранието и неделава нема да работи поради „чувствата на граѓаните“ по трагедијата во Кочани во која загинаа 59 млади, од кабинетот на собранискиот спикер Африм Гаши и пратеници од власта велат дека во парламентот работат на законски решенија, но и дека се среќаваат со семејства на настраданите. Сепак, ова не го менува фактот дека Гаши, потпретседателите и шефовите на парламентарните групи консензуално решија и неделава Собранието да не заседава откако не работеа ниту во деновите на жалост минатата недела.

Ова предизвика лавина негативни коментари на граѓаните на социјалните мрежи дека „во најтешкиот момент за земјата и за граѓаните, тие во Собрание ве претставуваат и застапуваат со две недели одмор“. „Ве гласавме за да воведете закон и ред, а не да бегате кога ќе згусне. И не грижете се, ќе продолжиме да се крепиме со донации, само вашите патни трошоци да не патат“.
Со неверување се огласија и поранешениот претседател на Собранието Тито Петковски, како и поранешни пратеници.

– Имајќи ги предвид чувствата на сите граѓани по трагедијата во Кочани, изразувајќи почит кон сите загинати и надеж дека повредените ќе се вратат во добра здравствена состојба што поскоро, Собранието консензуално, поддржано од сите пратенички групи, се одлучи да ги откаже сите активности планирани за оваа работна седмица – соопшти Собранието.

За да не се „истепаат“ за трагедијата во Кочани, ќе ги премолчат пратеничките прашања, Собранието две недели на пауза

Пратениците од пратеничката група на ВМРО-ДПМНЕ и коалицијата „Твоја Македонија“ велат дека секојдневно си ги извршуваат своите работни обврски.

– Како пратеници постојано работиме на спремање на законски решенија кои би се ставиле на идните седници од следниот понеделник. Дополнително, во сите општини каде има жртви и повредени од немилиот настан во Кочани, нашите пратениците се присутни во пратеничките канцеларии и имаат средби со граѓаните, излегувајќи пресрет на сите проблеми со кои се соочуваат – велат од пратеничката група на ВМРО-ДПМНЕ.

Пратеникот Миле Лефков од ВМРО-ДПМНЕ на Фејсбук објави дека е отворена пратеничката канцеларија во Кочани, каде тој има средби со граѓани на кои им е потребна помош по трагедијата.

– Нашата цел е да слушнеме, да помогнеме и заеднички да работиме на решенија што ќе обезбедат безбедност, поддршка и подобри услови за сите. Секој ваш збор е важен. Ве повикувам да дојдете, да зборуваме отворено и да направиме промени заедно – напиша Лефков.

Средби со граѓани во Штип денеска имал и координаторот на пратеничката група на ВМРО-ДПМНЕ Никола Мицевски.

Левица: Собранието избега од одговорноста

Левица обвини дека Собранието донело скандалозна одлука за „колективен одмор“.

– Левица беше единствената партија против ова самоволие, во моменти кога пратениците треба и мора да бидат на висина на задачата. Бегајќи од пратенички прашања, плашејќи се од вистината, Собранието избега и од одговорноста. Во овие моменти, кога е повеќе од потребно, Собранието не презема одговорност да носи закони, туку втора недела по ред бега од таа своја обврска – велат од Левица.

Според партијата, законодавниот дом е единствената непосредно избрана власт и „таа одговора пред народот, а не според желбата за играње криенка на премиерот Мицкоски“.

Петковски: Собранието ги напушти граѓаните

Поранешниот претседател на Собранието Тито Петковски во разговор за „Слободен печат“ жестоко го критикува неработењето на парламентот по трагедијата во Кочани. Тој порача дека најдобро е Собранието да се самораспушти, зашто во најтешките моменти пратениците ги напуштиле граѓаните. Петковски вели дека ако тој сега би бил претседател на Собранието, би закажал најмалку две комисии на кои пратениците би расправале зошто се случи трагедијата во Кочани, каде погрешивме и да се понудат можни решенија.

– Непријатно сум изненаден од тоа што се случува во Собранието, малку и револтиран, бидејќи Собранието, според Уставот, е централната инститција на нашиот политички ситем. Таму се одвиваат сите политички битки, се нудат програми, проекти и различни мислења за дадена ситуација. Собранието е во постојано заседание, а тоа не значи дека е во постојано неработење, односно тоа значи дека постојано треба да е ангажирано. Пратениците земаат плата и единствена работа им е да присуствуваат на седници и на комисиии и да нудат решенија, закони и одлуки во интерес на граѓаните. Во овој случај Собранието ги напушти граѓаните, не е претставник на граѓаните. Граѓаните не мислат дека Собранието не треба да работи – вели Петковски.

И експратеникот Љупчо Балковски вели дека Собранието е највисок претставнички орган на граѓаните и носител на законодавната власт.

– Во оваа тешка ситуација во Македонија, Собранието требаше и треба деноноќно да заседава и работи, да анализира и реагира, да ангажира во комисиите стручни лица кои заедно ќе достават измени во законите и Собранието ќе ги донесе, за нормално и правилно функционирање на државата. Со неработењето на Собранието, само се докажува големата поделба и нефункционирање на општеството – вели Балковски.

Петковски: Собранието да се самораспушти, во најтешкиот момент ги напушти граѓаните