Во текот на изминатата ноќ, екипите на ЈП „Комунална хигиена“ реализирале вонредни активности за подигнување и транспорт на отпад од диви депонии.

Оттаму информират дека биле отстранети приближно 60 метри кубни непрописно исфрлен кабаст, градежен и мешан комунален отпад на улиците Женевска и Васил Чакаларов во  општина Карпош, а интервенирано било и на улицата Брадфордска, во непосредна  близина на ресторанот „Македонска куќа“.

Отстранетите диви депонии се лоцирани претежно околу контејнерите наменети за одлагање комунален отпад, а се создаваат во периодот кога садовите се сосема празни и отпадот може да се одложи во нив, посочуваат од претпријатието.

ЈП „Комунална хигиена“ апелира да престане непрописното и несовесно исфрлање отпад на јавни површини што директно придонесува за загадување на животната околина и го загрозува јавното здравје.