Министерот за внатрешни работи Оливер Спасовски денеска оствари работна средба со претседателот на Републичкиот совет за безбедност на сообраќајот на патиштата (РСБСП), Гордана Кожуваровска на која беа договорени деталите за примопредавање на обезбедената опрема за надлежните сообраќајни единици во МВР.

РСБСП годинава обезбеди 15 моторцикли со комплет опрема.

Од МВР информираат дека со цел зголемување на безбедноста на сообраќајот на патиштата, Републичкиот совет секоја година наменува 30 отсто од средствата за модернизација на уредите и опремата на надлежната организациска единица во Министерството за внатрешни работи која врши контрола и регулирање на сообраќајот на патиштата.

Министерот Спасовски на средбата изразил задоволство од досегашната соработка со РСБСП со надеж дека истата и во наредниот период ќе биде интензивирана. Кожуваровска посочила дека соработката на РСБСП и МВР се реализира на високо ниво, потенцирајќи дека безбедноста во сообраќајот е врвен заеднички приоритет и дека со заедничка соработка и со комбинација од превентивни и репресивни мерки се придонесува за намалување на бројот на настрадани лица во сообраќајни незгоди.