Испакнати шахти, сообраќаен метеж и дупки среде улица се дел од предизвиците со кои се соочуваат возачите кога поминуваат низ улицата 808 во Автокоманда, долга еден километар, чија реконструкција започна пред околу две години. Поставена веднаш зад најголемите фабрики како „Алкалоид“, „Пивара“, производителот на слатки „Европа“ и неколку огромни маркети за домаќинство, автоделови и слично, оваа улица е постојано фреквентна и на неа поминуваат стотици автомобили во текот на денот.

Улицата, недопрена со децении од надлежните, за првпат доби внимание од Град Скопје пред речиси две години, откаде како надлежни за овој проект, во август 2023 година најавија и започнаа со нејзина целосна реставрација, но проектот изгледа запре бидејќи работата очигледно е оставена на „пола пат“.

-Улицата 808 е една од најфреквентните сообраќајници во овој дел од општина Гази Баба, а по неа се движат и голем број товарни возила бидејќи се работи за индустриска зона. Минатиот месец на оваа локација се изврши реконструкција на водоводната и атмосферската мрежа, а покрај реконструкција на коловозот на површина од 9.200 метри и должина од 1.000 метри, се изведуваат соодветно пешачка и велосипедска патека од двете страни на коловозот – истакна тогаш градоначалничката на Скопје, Данела Арсовска.

Оттогаш, проектот за реконструкција на оваа улица имаше само амбициозен почеток. Улицата беше и остана изгребана од стариот асфалт со месеци, за подоцна во октомври да биде поставен првиот нов слој, но по оваа втора фаза улицата остана ненивелирана, а на самата крстосница откаде почнува, веќе започнаа да се појавуваат дупки на недовршениот проект.

Најавената велосипедска и пешачка патека сѐ уште не се ни близу до почетната фаза на нивното изведување, земајќи предвид дека тротоарот се користи како паркинг за потрошувачите на околните продавници.

Во октомври минатата година, пак, незадоволството за недовршената реставрација на улицата 808 го искажаа и десетина компании, лоцирани на оваа адреса, кои испратија писмо до Градот и градоначалничката Арсовска во кое ги истакнаа проблемите со кои се соочуваат како продавачи, но и за постојаните поплаки од нивните потрошувачи.

-Оваа улица е една од најфреквентните сообраќајници во овој дел од општината, а по истата се движат и голем број товарни возила бидејќи се работи за индустриска зона и е една од улиците за влез во градот. Ние како правни субјекти кои работиме и се движиме секојдневно по оваа улица сме дирекно засегнати бидејќи имаме секојдневни пријави од купувачи и вработени за оштетени возила, трпиме штети и на службените возила и на крај, сето тоа влијае и на прометите. Сметаме дека надлежните институции треба во најкус можен рок да пристапат кон довшрување на улицата 808 заради доброто на градот, граѓаните и компаниите, се велеше во писмото на компаниите испратено до Арсовска на 17 октомври минатата година.

За жал, компаниите по испратеното писмо не добија одговор од Градот, а не испровоцираа ниту да се активираат екипите на ЈП „Улици и патишта“ за да им излезат во пресрет и да ги завршат работите на оваа улица во најбрз можен рок.

Екипата на „Слободен печат“ на терен забележа вистински лавиринт за возачите, постојана борба да се избегнат испакнатите шахти со постојани маневри налево и надесно. Ситуацијата е иста долж целата улица, почнувајќи од местото каде се наоѓаат големите продавници „Симпо“ и „Алфи“, па сѐ до нејзиниот крај каде што се вкрстува со булеварот Киро Глигоров.

-Во четири попладне овде е невидена гужва, бегајќи од градскиот метеж почнав да одам одовде, ама навистина е нерамно и долго време е оставено со дупки и со испакнати шахти од кои, ако не успееш да ги избегнеш, може да се искине гумата. Одовде само внимателно и полека, се надевам дека ќе ја довршат оваа улица што поскоро – вели случаен минувач за „Слободен печат“.

Во текот на последните две седмици, неколку пати испративме прашања до јавното претпријатие „Улици и патишта“, кое е изведувач на овој проект. На прашањата дали и кога целосно ќе го довршат асфалтирањето на оваа фреквентна улица, од градското претпријатие не добивме одговор.

Во меѓувреме, на крстосницата откаде почнува оваа улица и се спојува со улицата Интернационални бригади, која е на потегот од семафорите за влез во населбата Автокоманда до ресторанот „Дојрана“, каде претходно од постојаното минување на автомобили и товарни возила се појавија огромни дупки кои со текот на времето стануваа се поопасни за автомобилските браници, од Општината, во рамки на нивната надлежност, успеаја само предизборно да „закрпат“ некои од длабоките дупки на недовршената улица.

Од ЈП „Улици и патишта“ очигледно долго време не поминале оттаму за да ја видат состојбата во која ја оставиле оваа улица, со големи дупки и асфалтирана „до пола“, каде скоро две години е целосно отежнат сообраќајот за скопјани, кои на свој ризик и без алтернативна опција, секојдневно поминуваат одовде со своите возила.