Малиот Киан, кој на 22 август ќе наполни 40 дена, е целиот свет на пејачката Антониа Гиговска и на нејзиниот сопруг, Роберт Спасенцовски – Џокер. Гиговска, која е еден од нашите најмоќни женски вокали, во јануари годинава, токму на својот 22. роденден, објави дека таа и Роберт ќе станат родители. За првпат откако се омажи за својот колега музичар и стана мајка, Антониа ексклузивно за „Слободен печат“ зборува за мајчинството, за тоа каков сопруг е Роберт и вели дека тоа што станале родители релативно млади им е најдобрата животна одлука. Гиговска раскажува дека синот личи на Роберт, на кој му ја доделува титулата за најдобар татко. Ја раскажува и љубовната приказна со Џокер, но ги коментира и гласините дека се разделиле, откако таа објави едно интригатно „стори“ на Инстаграм. Антониа сподели и фотографии од нејзиното семејство, во домашен амбиент.

Интересно име му дадовте на синот, од каде токму Киан, има ли некоја посебна приказна врзана за ова име?

– Киан беше можеби 10-тото име по ред кое ни дојде на памет, и победничкото! Случајно ми излезе на Тик-ток листа на машки имиња во светот, го истражив и веднаш му го кажав на Роберт. Киан во превод значи крал, па оттаму решивме тој да биде нашето мало кралче.

Наскоро Киан ќе наполни 40 дена. Како ви поминаа изминативе недели, како се снаоѓате околу грижата за него, со оглед на тоа дека и ти и Роберт сте млади?

– Искрено, многу добро се снаоѓаме, не се ни сомневав во тоа со оглед на тоа што и јас и Роберт сме „дечари“. Ги охрабрувам сите млади на тој чекор, без разлика на стравот што секој го има и е нормален.

Како ти помина породувањето, имаше ли тешкотии и што си помисли кога за првпат го зема синот в раце?

– Породувањето пројде во најдобар ред и траеше неполни 40 минути. Чувството е незаменливо и не се споредува со ништо друго! Моментот кога го видов тоа мало носе исто како носот на Роберт, знаев за кого ќе го дадам животот ако треба.

Колку Роберт може да му се посвети на домот и на синот, со оглед на тоа дека и тој е музичар? Како ви се поделени обврските дома, ви помага ли некој?

– Роберт е прекрасен татко, му ја доделувам титулата за најдобар татко. Посветен е максимално на Киан, го пресоблекува, му дава да ручка, го бања, му свири и му пее песнички. Имаме максимална поддршка од неговите и од моите родители и се пресреќни за внучето.

Што значеше она твое „стори“ на Инстаграм, кое многумина го протолкуваа како крај на вашата љубов, и колку сега, кога имате полни раце работа, ве допираат неточни информации за вас?

– Тоa „стори“ го сфатија лошо или само сакаа нова приказна. Сакав да кажам дека сѐ е џабе ако оној што е со тебе не мисли дека сте најдобрата жена на светот. Навистина животот е прекраток да го делите со некој што не ве цени и ве повредува. Сум почувствувала и знам како е кога партнерот не те цени. Ценам кога мажот ќе знае и ќе биде свесен што има покрај себе, исто и жената. Таквата релација опстанува.

Како го запозна Роберт, во кој момент дозна дека тој е вистинскиот и кои се негови најдобри особини?

– Роберт и јас се споивме на многу чуден начин, и во таа наша приказна нема многу што да се каже, освен тоа што сѐ некако почна кога стана дел од мојот бенд. Се допревме за раце и одеднаш почувствував некоја чудна вибрација, нешто ми заигра во стомакот. Инаку, се знаеме 8 години, и никогаш не сме се гледале на тој начин. На крај памет дека јас и тој ќе бидеме маж и жена и ќе имаме дете. Јас не верувам во случајности, но верувам во судбина, верувам во она „сѐ се случува со причина“. Сигурна сум дека оној горе ги наместил коцките и му благодарам многу. Негови најдобри особини – ги има многу, но нешто што најмногу почитувам е што секогаш е реален и сѐ кажува в лице, сака да помогне и сѐ ќе даде за тој што го сака, а не очекува за возврат, упорен е и силен и има срце како планина.

Како те побара за жена, имавте ли дилеми во одреден момент, дали одлуката да стапите во брак и да станете родители е вистинската и дали е вистинско време за тоа?

– Во ниеден момент не се двоумевме. Киан е нашата најдобра животна одлука. Чувството да си родител е незаменливо, а чувството кога некој ќе те побара за жена, кажува дека некој те сака и сака да го помине остатокот од животот со тебе.

На фотографиите и на видеата што ги објавуваш изгледаш одлично, успеваш ли да внимаваш на здравиот начин на исхрана и да се грижиш за линијата?

– Иако не смеам сѐ уште да тренирам, пробувам колку можам да внимавам на исхраната, затоа што ми следат многу нови проекти, но навиката да се гледаш во топ форма… не се плашам, сега и не е тоа важно. Има време за сѐ!

Ти недостасува ли пеењето, имаш ли планови за понатаму и дали можеме да очекуваме дуетска песна со Роберт?

– Многу! Веќе се вклучувам, исклучувам пауза и стискам старт. Почнувам во студио и работам на нови проекти, го најавувам мојот камбек. Едвај ги чекам настапите. А, за дует не сме размислувале, но работиме заедно во студио и си помагаме!