Претседателот на Република Словенија, Борут Пахор ќе допатува попладнево во Косово, каде што првично ќе биде пречекан од претседателката на државата, Вјоса Османи, а подоцна ќе се сретне и со премиерот Албин Курти, јави дописникот на МИА од Приштина.

Како што е објавено, посетата на Пахор е дел од неговата турнеја на земјите од регионот, а е во функција на подготовките за 11-тиот самит на Процесот Брдо-Бриони, што на 12 овој месец ќе се одржи во Брдо крај Крањ во Словенија.

Приштинските медиуми напоменуваат дека Пахор доаѓа во Косово неколку дена по посетата на Србија, каде што изјави дека се залага за продолжување на косовско-српскиот дијалог и дека очекува од косовските власти да ја исполнат преземаната обврска во преговорите со посредство на Европската унија за формирање на заедницата на општини со мнозинско српско население.

– Секогаш кога сум ги среќавал моите пријатели во Приштина сум им рекол дека треба да се формира Заедницата на српски општини доколку сакаме еден процес да биде доверлив. Во Приштина првото што ќе го речам е дека преостанатите актуелни прашања, во септемвери и октомври треба да се решат со дијалог и второ дека дијалогот треба да биде пожив. Мислам дека има многу недоверба, изјави Пахор во Белград.

Според агендата на посетата, словенечкиот претседател ќе биде пречекан од неговата косовска колешка во 15 часот, додека средбата со премиерот Курти е предвидена за 16.45.