Вечерва стартуваат квалификациите за пласман на Светското првенство 2022 година во Катар, а еден од најитересните дуели ќе биде меѓу Словенија и Хрватска кој ќе се игра во Љубљана.
Еден од актерите кои ќе истрчаат на теренот на стадионот „Стожице“ ќе биде и Андраж Шпорар кој одлучи да изнајми приватен авион само за да стигне на време за натпреварот.
Фудбалерот на португалска Брага до недела имаше клупските обврски, но сепак успеа да пристигне на собирот на репрезентацијата на Словенија иако авионскиот сообраќај во Европа е редуциран поради пандемијата на коронавирусот.
Бидејќи не можеше да обезбеди авионска линија до Љубљана, Шпорар се одлучи да изнајми приватен авион за да стигне на време на подготовките. Најголем дел од трошоците ги покри самиот фудбалер, а помала сума плати фудбалската федерација на Словенија.